The God is not a supervisor

கடவுள் ஒரு மேற்பார்வையாளர் அல்ல!

இறைவன் படைத்தான் என்பதெல்லாம்

பொய்தான் இதில்ஆதாரம் ஏதுமில்லை 

நோக்கம் என்னவோ படைப்பதற்கு?

ஆட்டுவிக்கும் தலைவரோ இறைவன்?

ஆதாரமாக இறையேநின்று பரிணமித்தான்

உலகமாக பிறஉயிராக மனிதனாகவும்!

உண்மையிது அறிந்தபின் இயல்புநீதியறிக!

எங்குமிருக்கும் இறைகாணாது கண்களால்.

உன்செயல் விளைவால் தவறாதுநீதிதரும்,

இறைக்கும் உனக்குமிடையே ஓராள்தேவையோ?

உனக்குள்ளே கடந்துதவமாய் சிந்திப்பாய்!

உண்மையிதை அறிந்துநெறி வாழ்வாய்!

விளக்கம்:

மக்களை மயக்கி, அவர்களிடமிருந்து பணம், பொன், பொருள் பறிக்க திட்டமிட்டே, இறை தத்துவத்தை மறைத்து, இறைவனை ஒரு ஆளாக மாற்றி, படைத்தான் என்று கதை கட்டினர். இறையானது, உலகை, தாவரம், உயிரங்கள், நம்மை படைத்து ஆட்டுவிப்பதற்கு காரணம் வேண்டுமே? எனவே இந்த பொய்யை நம்ப வேண்டியதில்லை.

இறைத்தன்மையே ஒவ்வொன்றிலும் ஆதாரமாக நின்று பரிணமித்தது என்பதுதான் உண்மை! ஓவ்வொன்றும் இறையின் பல்வேறு வடிவங்களே ஆகும். ஆனால் இக்கருத்தால், இயற்கை மீறி நான் என்ன நினைத்தாலும், செய்தாலும் நடக்கவேண்டும் என்றால் அப்படியாக நிகழாது. இறை நம் கண்களுக்கு காணாத அகதோற்றமாக இருக்கிறது. ஆனால் நம் செயல்களின் விளைவுகளாக வந்து நிகழ்வதை நாம் காணமுடியும். அதுவே இறைநீதி. அது என்னவென்றால், “உனக்கும், பிறருக்கும் நன்மையே செய், துன்பப்படுவோருக்கு உதவி செய்” என்பதுதான்.

இப்படியான இறை உணர, இறைக்கும், உனக்கும் இடையே மற்றொரு மனிதர் தேவையில்லை. ஆனால் உன்னை உயர்த்த “குரு” வேண்டும். உன்முயற்சியால் அவர் உன்னையே தேடிவருவார் என்பதும் உண்மையே! அத்தகைய குருவின் மூலம் “கடந்து உள்ளே” தவம் செய்ய, உண்மை அறிந்து நெறியான வாழ்வில் மகிழ்வீர் என்று இக்கவி விளக்குகிறது.

வாழ்க வளமுடன்.

-----