Understand What is the God

 தெய்வம் எது என்று சிந்தனை செய்!

தெய்வம் என்பது என்னவென்று

முதலில் முடிவு செய்துவிடு

ஆளா ஆணா பெண்ணா?

உருவமா அருவமா கண்டுபிடி!

காணும் இயற்கை வடிவா?

காணக் கிடைக்கா ஒன்றா?

அணுவில் அடங்கி இருப்பதுவா?

அணுவை கடந்து இருப்பதுவா?

அப்படி எதுவும் இல்லையென்று

பகுத்து அறிவு கொள்வாயோ?

அறிவாய் இருப்பதே இறையென்ற

சிந்தை உயர்ந்து தெளிவானால்

சிறப்பாய் உலகில் வாழ்வாயே!

விளக்கம்:

சிலர் இறைவன் மீது பாரத்தை போட்டு செயலை ஆரம்பிக்கிறேன் என்பார்கள். இறைவன், அய்யன் என்றால் ஆண்பால். இறைவி, அம்மன் பெண்பால். தெய்வம் என்றால் பொது. இப்படியாக பால்பேதம் பிரித்தும் வணங்குகிறார்கள். பலப்பல தெய்வங்கள் மட்டுமில்லாமல், திடீரென்று முளைக்கும் தெய்வங்களும் உண்டு. இந்த தெய்வம் என்பது என்ன? எது? எப்படி? என்ற கேள்விக்கு ஒரு விடையை கண்டுபிடித்தால்தான், தெய்வம் என்ற வகையில் நாம் செய்யும் தவறுகள் தெரியும். 

சிந்தனை தெளிந்தால், நிஜமாகவே நாம் வணங்குவதை அத்தெய்வம் ஏற்றுக்கொள்கிறதா இல்லையா என்பதுகூட தெரியவரும், அது நமக்கு நம் வேண்டுகோளுக்கு பலம் தருமா இல்லையா என்பது தெரியவரும். எதிர்பார்த்து  ஏமாற்றம் பெறவும் அவசியமில்லை. ஒருவேளை இறை நம்பிக்கையின்றி, கடவுள் இல்லை இல்லவே இல்லை என்று பகுத்தறிவால் சொன்னாலும், அந்த அறிவாக இருப்பதுவே இறை என்பதை சிந்தித்து தெரிந்துகொண்டால், மனக்குழப்பங்கள் நீங்கி, உலகில் வாழும் வாழ்க்கையை சிறப்பாக வாழலாம். தனிமனித அமைதி கிட்டும், உலக அமைதியும் கிட்டும்.

வாழ்க வளமுடன். 

------

Thanks to Photo: Copyright to it's owners