Understand the Sexual Desire

பாலுறவு புரிந்துகொள்வோம்

காமத்தை வெல்வதற்கு எழியவழி

காமத்தோடு கலப்பதுவே முறையாம்.

பசிதீர்க்கும் உணவுண்ணல் போலவே

திருப்தியாய் காமம்தீர்த்தல் ஓர்தீர்வே!

உன்பிறப்பே காமத்தில் என்பதால்

பிழையில்லை காமம் எழுவது-ஆனால்

உலகில் உன்னை உசுப்பேற்றும்,

சிந்தைகெடும் பாலுறவில் சிக்காதே!

தேவையெண்ணி விலகினிற்க கற்றிடு! 

உபயோகத்தில் அளவுமுறை காத்திடு!

அறிவுமனம் காமத்தில் சிக்கிவிட்டால்

அத்தனையும் பாழாகும் வாழ்வுவீணாம்! 

விளக்கம்:

காமம், பாலுறவு, ஆபாசம், பால் கவர்ச்சி, பாலுணர்வு  இப்படி எந்த வார்த்தையில் சொன்னாலும் ஆர்வம் மிகுவது உண்மையே. இதில் ஆணும் பெண்ணும் வித்தியாசமில்லை. இந்த ஆசை எழுவது இயற்கையே. ஒரு மனிதனுக்கு பசி என்பதுபோலவே தான். ஆனால் ஒன்றும் அறியாத இளம் பருவத்தினரை, இந்த உலகம் பாலுணர்வு கவர்ச்சி காட்டி திசை திருப்புகிறது. அதிலே ஈடுபட்டு தன்னையும், பிறரையும் இழந்து, உடலையும் கெடுத்து, சமூகத்தில் இழி நிலைக்கு உள்ளாகின்றனர். மனம் இதில் சிக்கி விடுபட முடியாமல் இருக்கின்றனர். 

காமம், பாலுறவு, ஆபாசம், பால் கவர்ச்சி, பாலுணர்வு என்று சொல்லப்படுவது எது என்று குறிப்பிட்டு விளக்கமளிக்க யாருமில்லை. பக்தியிலும் யோகத்திலும் கூட ஒதுக்கி வைக்கப்பட்டுள்ளது. உலகின் பெரும் குற்றங்கள் இதன் அடிப்படையிலேயே நடப்பதை நாம் அறிவோம். 

அத்தகைய நிலையிலிருந்து விடுபட்டு, அளவு முறையோடு அனுபவிக்க, பயிற்சி முறைகளோடு வழிகள் தந்திருக்கிறார், மகான் வேதாத்திரி மகரிசி அவர்கள். பாலுறவும் ஆன்மீகமும் என்னும் தலைப்பில் நூலும் எழுதியிருக்கிறார். மனவளக்கலையில் உங்களை இணைத்துக் கொண்டால் இத்தெளிவு எல்லோருக்கும் கிடைக்கும். வாழ்வு இனிதாகும்.

வாழ்க வளமுடன்.

-----

Thanks to Image by: ShutterStock