We have the power to change

மாற்றும் வலிமை நம்மிடமே!

திருத்தம் வேண்டும் என்றால்

திடீரென்று ஏதும் நடந்திடாது.

நேற்றைய செயலின் விளைவே

இந்தநாளில் நாம் பெற்றிருப்பது.

கடந்துச் செல்லும் காலநேரத்தில்

ஏதொன்றும் திரும்பி வராதென்ற

உண்மை முதலில் உணரவேண்டும்.

திருத்தமொடு செய்யப் பழகினால்

வருத்தமொன்று எழுமோ சிந்திப்பீர்.

திருந்த வேண்டியதும் நிறையவே

திருத்த வேண்டியதும் நிறையவே

எனினும் அததற்கு அவகாசமுண்டு

தனிமனிதன் திருந்த சமூகம்மாறும்!

விளக்கம்:

முதலில் அவர் மாறட்டும், நான் பிறகு மாறிக்கொள்கிறேன் என்றுதான் நமக்கு தோன்றும். அவர் செய்யட்டும், பிறகு நான் செய்கிறேன் என்றே அடுத்தவரை எதிர்பார்த்தே நாம் வாழ்கிறோம். இது பொய்யான, பொருந்தாத எதிர்பார்ப்பு ஆகும். அவரவர் அவரவரின் வாழ்க்கை அறிவின்படியே வாழ்கிறார்கள். உங்களுக்கு தெரியாத உயர்ந்த கருத்து அவர் சிந்தனைக்கு வராது என்றால், அவர் எப்படி திருந்துவார்? அதற்கு வாய்ப்பு இல்லையே?

முதலில் அறிவு விளக்கம் பெற்ற நாம் திருத்திக்கொண்டால், உங்கள் நல்ல, நேர்மையான, சிறந்த நடவடிக்கைகளை பார்த்து, முதலில் உங்களை ஏமாளி என்று சொன்னாலும் கூட நாளடைவில் உங்கள் ஒழுக்கத்தைப் பார்த்து, உங்களிடம் மட்டுமாவது அவர் நேர்மையாக நடக்கப்பழகுவார். காலம் செல்லச்செல்ல அவரும் உங்களைபோல நேர்மையானவராக மாறிவிடுவார். இப்படியாக சமூகமே மாறும் அல்லவா? இன்றே தொடங்குக என்று இந்தக்கவிதை விளக்குகிறது. 

-----

Thanks to photos: Copyrights to it's owners