Wedding and Life Partner

 திருமணமும் வாழ்க்கை துணைவரும்!

உன்மீது முழுஅக்கறை உள்ளோர்

நால்வர் தாய்தந்தை குருதவிர

பின்வரும் வாழ்க்கை துணையே!

பெற்றோர் விட்டுசென்ற குறைகளை

தீர்த்தலே துணையோடு வாழ்தலாம்!

அதுவன்றி குருவுபதேசம் உதவாதே!

எதிரெதிராய் நிற்பதில் பயணில்லை.

அன்புகொண்டு ஏற்பதில் தவறில்லை!

ஆணைவிட பெண்ணே முதன்மையாம்

முழுக்காலம் பிறந்தகம் விட்டுவாழ்தலால்!

குறைவில்லை விட்டுகொடுத்து நீடுழிவாழ்க!

விளக்கம்:

ஒரு ஆண்மகனை அவன் வாழ்வில் அல்லது ஒரு பெண்மகளை அவள் வாழ்வில் அக்கறை கொண்டு, உயர்த்துபவர்கள் நால்வர். அதில் மனைவி அல்லது கணவன் நான்காவதாக, பருவ வயதில் வந்து சேருவார். தாய், தந்தை, குரு ஆகிய மூவரின் அறிவுரைகளை ஏற்று வழி நடத்தும் சிறப்பு, வாழ்க்கை துணைவருக்கே கிடைக்கிறது. மேலும் குரு உபதேசம் பெற்று, வாழ்க்கை முழுமை அடைவதில் திருமணம் முக்கிய பங்கு வகிக்கிறது என்பது உண்மை.

எனவே வாழ்க்கைத்துணையோடு சின்னச்சின்ன பிரச்சனைகளுக்கு எதிர் வழக்காடுவது தேவையில்லை. வேதாத்திரி மகரிசி அவர்கள் சொன்னதுபோல, அதிக அன்பு உள்ளவர் விட்டுக்கொடுப்பதில் தவறில்லை. அப்படியான விட்டுக்கொடுத்தலில்தான் வாழ்க்கையும் மகிழ்வாக இருக்கும்.

மேலும் பெண் திருமணத்திற்குப் பிறகு, கணவன் வீட்டோடு இருந்து, தன் வீடாக கருதி வருகிறாள் என்பதால் அவளே இங்கே சிறப்படைகிறாள். அதை உணர்ந்து அப்பெண்ணுக்கு மதிப்பு தருவதில் குறையொன்றும் இல்லை. ஒருவரை ஒருவர் புரிந்துகொண்டு வாழும் வாழ்வுதான் சிறப்பானது. இத்தகைய உண்மையை இக்கவி விளக்குகிறது. 

வாழ்க வளமுடன். 

-----

Thanks to Image by: @Neeta Sankar