Training for Tolerance?!

பொறுமை பழக்கும் பயிற்சி!

மகிழ்ச்சி பிறரால் வருகிறதென்றும்

துன்பம் விதியால் வருகிறதென்றும்

மாயை அப்படி நினைத்துகொள்ளல்!

எதுவும் வராது பிறராலும்விதியாலும்.

உனக்குத் தனியாய் கேடுகள்செய்ய

எப்படி துணியும் இயற்கையும்மனிதமும்?

உன்செயலின் எதிர்விளைவு திருப்பித்தரும்

செயல் விளைவு நீதியன்றோஅது?!

இன்றே எண்ணம் சொல்செயல்திருத்த

இனிதே, நடப்பது உன்னைவருத்தினாலும்

போனது வினையென்று பொறுமைகொள்க!

துணையாய் அகத்தவம் கற்றுக்கொள்க!

விளக்கம்:

தன் பிறப்பில் நிகழ்கின்ற ஓவ்வொன்றிலும் துன்பமே எழுகிறது, இது என் தலையெழுத்து, விதி என்று வேதனைப்படுவார்கள். மகிழ்ச்சி வேண்டுமென்றால், அது தன்னாலோ, தனிமையிலோ கிடைக்காது, இன்னொரு நபர் அருகில் இருந்தால்தான் கிடைக்கும் என்று நம்புவார்கள். ஆனால் அப்படி இணைந்து இருந்தாலும் துன்பம் எழுவதைக் கண்டு மேலும் வருந்துவார்கள் என்பதும் உண்மையே.

துன்பமோ, மகிழ்ச்சியோ யாரும் தருவதில்லை, யாரும் பறிப்பதில்லை. நம்மை துன்புறுத்துவதில் இயற்கைக்கு என்ன பலன்? பொதுவாக எந்த மனிதரும் உடனடியாக பிறருக்கு துன்பம் தருவதில்லை என்பதை உணர்வேண்டும். நம்முடைய எண்ணம், சொல், செயல் இவற்றால்தான் நமக்கு துன்பம் எழுகிறது என்பதை ஆழ்ந்து சிந்தித்தால் அறியலாம். ஆனால் அதற்கு அவகாசம் இல்லை. இயற்கையின் வினை விளைவு நீதி என்றோர் நிலையில், நாம் எதை செய்தாலும் அதற்கு பதில் கொடுத்துக் கொண்டே இருக்கும் அமைப்பு உண்டு, அதை உணர்ந்து நாம்தான் தன்னை திருத்திக் கொள்ள வேண்டும்.

இப்படி தன்னை திருத்தும் வேளையிலும் ஏதேனும் துன்பம் நிகழ்ந்தால், அது ஓர் வினையின் கழிவு என்று பொறுமைகொண்டால், மகிழ்ச்சியையும், இன்பத்தையும் தனியே தேடியலைய வேண்டியதில்லை. மேலும் அகத்தவம் கற்றுத்தேர்ந்தால் இம்மாற்றம் நிகழும், அதுவே நம் மனதிற்கு, அறிவிற்கு பலமூட்டும் என்றும் இக்கவி விளக்குகிறது. 

வாழ்க வளமுடன்.

-----

Thanks to Image by: Google and its copyrighted owners