What do you get from penance?!

தவத்தால் என்ன கிடைக்கும்?!

வார்த்தையால் சொல்ல முடிவதில்லை,

உள்முகமாக கிடைக்கும் மலர்ச்சியது!

பிறந்ததன் நோக்கம் அறிந்தமுழுமை!

எவற்றிலும் தன்னை காணும்பார்வை!

தன்னிலும் தன்னை அறிந்துமகிழ்தல்!

இருந்தவந்த வினைப் பதிவுகரைத்தல்!

புதிதாயெந்த வினை சேர்க்காதிருத்தலில்,

முக்காலம் உணர்ந்த செயல்திருத்தம்!

செயல்விளைவு அறிந்த வாழ்க்கைமுறை!

இவ்வளவு நாள் இதையறியமறந்தேனே!

என்றே நம்மை வருத்தப்படவைக்கும்!

விளக்கம்:

தவம் கற்றுத்தேர்ந்தால், வாழ்க்கை சிறக்கும் என்று பொதுவாக சொல்லுதல் உண்டு. ஆனால் எப்படி? என்ற கேள்விக்கு இக்கவி விளக்கம் தருகிறது.

நான் யார்? என்ற கேள்வியின் தேடலாகவே தவம் ஆரம்பிக்கிறோம். ஏற்கனவே நம்மோடு கலந்திருக்கும், வினைப்பதிவுகளின் இயல்புக்கேற்ப, முழுமை பெற காலம் எடுத்துக்கொள்ளும் என்பது உண்மை. எனவே விடாமுயற்சி வேண்டும். திடீரென்று மின்னலென உண்மைகள் புலப்படும். அவை என்னென்ன?

உலகில் பிறந்த காரணமும், உண்மையும் புரியும், எவற்றிலும் இறையே மலர்ந்திருப்பதை அறியலாம், தனக்குள்ளாகவும் இறையே இருப்பதை உணரலாம். இதுவரை இருந்த வினைப்பதிவுகள் (கர்மா) அகன்றிடும். இனியும் சேரா விழிப்புணர்வுடன், இயற்கை செயல் விளைவு நீதி அறிந்து செயலாற்ற முடியும். முக்காலம் உணரும் ஞானம் வந்துவிடும்.

இந்த உண்மைகளை இவ்வளவு நாள் உணரமுடியாமல், வீண் செய்து விட்டேனே என்ற மெலிதான வருத்தமும் வந்துவிடும், எனினும் பேரின்பமாக நிலைத்திருப்போம்.

வாழ்க வளமுடன்.