Yoga as a support

துணையாக யோகம்!

இளமையில் எல்லாம் துறத்தல்

வாழ்வில் சிலருக்கே நடக்கும்.

குடும்ப சுமையை ஏற்றுநடத்தி

வறுமை அகற்றி செழுமைகாத்து

இல்லறக் கடமை நிறைவேற்றி

வருங்கால சந்ததி சிறப்புறவே

யோகத்தில் இணைதல் நலமாம்!

ஏழ்மை  வறுமை சமூககடமை

இவைதீர்க்க முயன்று நின்றே

துணையாய் யோகம் கொள்வாய்!

தப்பித்து விலகிஓடி ஒளிந்தபடி

கற்றயோகம் நிறைவை தாராது!

விளக்கம்:

கபிலவஸ்து நாட்டின் மிகப்பெரும் அரசனின் மகன், கௌதமன், திடீரென்று ஒரு நாள் ஞானம் பெற்றான், புத்தன் ஆனான். இப்படி பிறப்பிலேயே எல்லாம் துறந்து, இறை உணர்தல் வெகு சிலருக்கே நடக்கும். பொதுவாகவே ஒரு மனிதன் யோகத்தில் ஆர்வம் கொள்வதில்லை. சிலர் வாழ்க்கையை வெறுத்து, ஏழ்மை, வறுமை இவற்றிலிருந்து தப்பிக்க, யோகத்தை நாடுவார்கள். 

அந்தக்காலத்தில் சமூகத்திலிருந்து விலகி, காவி, தாடி,மீசை, திருவோடு கோலம் கொண்டு, பிச்சை கேட்டோ அல்லது கிடைப்பதை தின்றோ வாழ்வார்கள். ஆனால் அவர்களை முற்றும் துறந்தவர் என்று கூட முடியாது. இவர்களை வளர்த்து ஆளாக்கிய சமூகத்தின் கடமையிலிருந்தும், குடும்ப கடமையிலிருந்தும் தப்பித்து விட்டார்கள் என்பதுதான் உண்மை.

ஏழ்மை, வறுமை இவற்றை நன்கு உழைத்தால் சரி செய்துவிடலாம், பிறக்கும்பொழுதே யாரும் பணக்காரராக பிறந்து விடுவதில்லை. எனவே குடும்ப சமூக கடமையில் இருந்து தப்பி பிழைத்து யோகம் கற்றால் பலன் தராது.

குடும்ப சுமை ஏற்று அதை திருத்தி, தந்தை தாய் கடமை நிறைவேற்றி, இல்லற கடமையும் ஏற்று யோகம் கற்றலே சிந்த வழி. இதன் பிறகு பிறக்கும் குழந்தைகள் இறை உணர்வோடு வளமாக வாழ்வர்.

எனவே ஏழ்மை, வறுமை, சமூக கடமை இவைகளை தீர்க்க முயன்று அதற்கு துணையாகத்தான் யோகம் கற்ற வேண்டும் என்று இக்கவி விளக்குகிறது. 

வாழ்க வளமுடன்

-----

Thanks to Image by: internet source