Pleasure is everywhere

இன்பமே எங்கும்

எங்கும் எதிலும் இன்பமே உள்ளது

தொட்டு கேட்க பார்க்க மணக்க

இன்னும் சுவைக்க இன்பமே எழும்!

துன்பம் என்பது என்ன எனஅறிய

இன்பம் அளவு அதுமீறிட துன்பமாம்!

உண்மை இதை அறிந்தே எதிலும்ஓர்

அளவில் திருப்தி கொண்டு இன்பமே

நுகர்ந்து இனிதாய் உலகில் வாழலாம்!

விளக்கம்:

எல்லோரும் சொல்வது போல, இந்த உலகம் துன்பம் மிகுந்ததாக இருக்கிறது என்பதை ஏற்றுக் கொள்வதிற்கில்லை.  ஒரு மனிதரிடம், உன் வாழ்க்கை துன்பமா? என்றால் ஆம் என்பார். அப்படியானால் அதற்கு முன் இன்பமாக இருந்தாயா? உணர்ந்தாயா? என்றால் ஆம் என்றோ, ஏதோ ஓர் அளவில் இன்பம் கிடைத்தது என்பார். அப்படியானால் அவர் வாழ்வில் இன்பம் கிடைத்திருக்கிறது. ஆனால் அந்த இன்ப அனுபவத்தை சரியான அனுபோகமாக கொள்ளவில்லை என்பதுதான் உண்மை.

அனுபோகம் என்றால், ஒர் அளவில் இது போதும் என்று தன்னை முறைப்படுத்திக் கொள்வது ஆகும். உதாரணமாக உங்களுக்கு, நெய் தோசை பிடிக்கும் என்று உங்களுக்கு ஆறு தோசை தட்டில் வைத்துவிட்டார்கள். வழக்கமாக நீங்கள் மூன்று தோசைதான் சாப்பிடுவீர்கள். வற்புறுத்தினால் கூடுதாலாக ஒன்று, ஆக நான்கு தோசைதான் உங்கள் அளவு. அதற்கு மேல் தாங்காது என்று எழுந்துவிடுவீர்கள். இன்றோ புது நெய், நல்ல மணக்கும் தோசை. ஏதோ பிரியத்தில் ஆறும் சாப்பிட்டால் என்ன ஆகும்? அளவு 3, மிகை 4, மீறி 6 ஆனால் அது துன்பம் தானே தரும்?!

எனவே எங்குமே இன்பம் நிறைந்துதான் இருக்கிறது. எந்த செயலிலும், அனுபவத்திலும் இன்பமே தான் கிடைக்கிறது. ஆனால், அந்த இன்பத்தின் அளவு மீறிட, முறை மீறிட துன்பம் வந்துவிடுகிறது. இதனால் துன்பம் வேண்டாம் என்றால், கிடைக்கின்ற இன்பத்தில் ஓர் அளவு, முறை, திருப்தி வைத்துக்கொள்ள வேண்டியது அவசியமாகும். அப்படி வாழப் பழகினால், உலகில் உள்ள எல்லா இன்பங்களையும் அனுபவிக்கவும் முடியும் என்று இந்தக்கவிதை விளக்கம் அளிக்கிறது.

வாழ்க வளமுடன்.

-----

Present by: