This is not your nest!

 உன் கூடு இது அல்ல!

கூடில்லாத பறவை தனக்குதானே

கூட்டைக் கட்டிக் கொண்டதுவே

கூடுஇது தற்காலிகமதை மறந்தேதான்

கூட்டிற் குள்சிக்கிசிறைப் பட்டதே!

கூடுபலமாய் இருந்த காலம்வரை

கூடிப்பல இன்பம் அனுபவித்ததே!

கூடுவிட்டு வரகூப்பிட அதுமறுத்ததே!

கூடுபழுது ஆனபின் புலம்பியழுததே!

கூடுதனி பறவைதனி பிரிந்துபோனதே

கூடுஎது உண்மையென்று அறியாமலே!

விளக்கம்:

எங்கும் விரிந்து பறந்து திரிந்த ஒருபறவை, தன்னைப்பற்றி சிந்திக்க ஒரு இடம் தேடி, ஒரு கூடு கட்டிக் கொண்டது. ஆனால் கட்டிய அந்த கூடி தற்காலத்திற்கு மட்டுமே உதவும் என்பதை மறந்து, அந்த கூட்டிலேயே இருந்துகொண்டது. அதாவது சிக்கிக்கொண்டது எனலாம்.

அந்த கூடு பலமாக, உறுதியாக இருக்கும்மட்டும் எந்த குறையும் இல்லாமல், எல்லா இன்பங்களையும் பெற்று அனுபவித்து மகிழ்ந்தது. வெளியே சுதந்திரமாக பறந்த சில பறவைகள், இது உண்மையான கூடு அல்ல, இந்த சிந்தனைக்கு வந்துவிடு என்று சொல்லியும், மறுத்து கூடுவிட்டு வெளியே வரவில்லை.

காலம் கடந்தது, கூடு முன்னைப்போல உறுதி இல்லை, பறவையை தாங்கும் வலிமையும் கூட்டுக்கு இல்லை. அக்கூட்டை சரிசெய்ய முயன்று தோற்று அழுது புலம்பியது அப்பறவை. சிறுதுகாலத்தில், கூடு நொறுங்கிப்போனது. பறவை வேறெங்கோ பிரிந்து போயிற்று. சோகமாக, எது தன் உண்மையான கூடு என்பதை அறியமலேயே அதன் வாழ்க்கை முடிந்தது. இப்படியாக பறவை மூலமாக, உயிரும் உடலும் குறித்த விளக்கமாக இக்கவிதை உண்மை தருகிறது.

வாழ்க வளமுடன்.

-----

Present by: