Benefit in any activity

 எச்செயலிலும் நன்மை!

தனிமனிதன் என்றாலும் தனிமுடிவு ஆனாலும்

எம்முடிவும் உலகோ குடும்பமோ நேர்செய்யும்

பிறரோடு விரோதம் கொண்டு ஆற்றும்செயல்

தனக்கே பேரழிவாய் காலம்பதிவு ஏற்றித்தரும்

உன்னையே நேர்செய்ய துணையாக எவரும்கூட

வருவார் உனைத்திருத்த இறையின் செயலது!

உண்மையிதை உணர்ந்து உன்செயலில் நன்மை

வருமளவு கடமையாய் ஆற்றநலம் அனுபவமிது!

விளக்கம்:

இந்த உலகம் ஒரு காலத்தில், மனிதர் கூட்டங்களை கொண்டிருந்தது. பிறகு அக்கூட்டங்கள் பிரிந்து கூட்டு குடும்பங்கள் ஆகின. தற்காலத்தில் இரண்டு நபர்கள் இருந்தாலே அது குடும்பம் என்றாகிவிட்டது. மனித வாழ்வின் இயக்கத்தில், தனக்கும் தன் குடும்பத்துக்கும் ஆற்றும் செயல்களில் எவ்வகையிலாவது, உலகமக்களுக்கான பொது நன்மையும் கலந்திருக்க காணலாம். ஆனால் அது எல்லா நேரங்களிலும் நன்மையாக இருக்கிறதா என்றால் இல்லை. பொருள்முதல்வாத உலகில் (Materialistic World) பணமும், பொருளாதாரமும் பிரதானமாக இருக்க, மக்களை ஏமாற்றியும், வாழ்க்கை, இயற்கை வளங்களை சிதைத்தும், வருங்கால சந்திக்கான உலகை கெடுத்தும் வாழ்வதை, பெரும் நோக்கமாகவே கொண்டிருக்கிறார்கள். இவர்கள் யார் என்று அடையாளம் காணமுடிவதில்லை.

ஒரு தனித்த மனிதன், குடும்பத்தில் ஒருவர் எடுக்கும் முடிவு, தவறாக இருக்குமானால், உலகில் யார் ஒருவரோ, குடும்பத்தில் இன்னொருவரோ அவரை “இப்படிச்செய்யாதே” என்று திருத்துவார்கள். விரோத மனப்பான்மையில் மீறி செய்வாரேயானால், அது அவருக்கே பெரும் பழியாகவும், கர்மாவாகவும் மாறி துன்பம் தரும். இது இயற்கையின் செயல் விளைவி நீதியாகும். இது ஏன் நடக்கிறது?

தவறு செய்யும் அந்த மனிதரை திருத்தி அமைப்பதற்கு, நல்வழி காட்டுவதற்கு பிறர் மூலமாக உன்னைத் திருத்தும் இறையின் செயல் ஆகும். “இதையெல்லாம் நான் நம்பனுமா? என்று கேட்போரா நீங்கள்?!” அகத்தவத்தின் வழியே உண்மை உணர்ந்தவர்கள், இதை எளிதில் புரிந்து கொள்வார்கள். மற்றவர்களுக்கு புரிவது கடினம் ஆகும். 

இறையே நம்மை திருத்துகிறது என்ற உண்மையை புரிந்துகொண்டு, தனக்கும் பிறருக்கும் நன்மையே அளிக்கும் செயல்களை, தன் கடமையாக உணர்ந்து செய்தால் நலமே விளையும், இந்த உண்மைகள் எல்லாம் அனுபவாயிலாக உணர்ந்தவை ஆகும். இவ்வாறாக இறையே நம் செயலில் நம்மை திருத்துகிறது என்ற உண்மையை இக்கவிதை நமக்கு விளக்குகிறது.

வாழ்க வளமுடன்

-----