Can we miss the opportunity?

 வாய்ப்பை இழக்கலாமா?

பயணம் மேற்கொண்டோம் இவ்வுலகில்

வந்தோம் வாழ்கிறோம் மகிழ்கிறோம்

எனினும் துன்பமேகண்டு துவழ்கிறோம்

பயணத்தின் நோக்கமும் மறந்திட்டோம்

ஏதேதோ அதுவோஇதுவோ குழம்பிட்டோம்

பயணம் முடிவுறும்கால அறிவுறுத்தல்

அவ்வபோது வந்துசேர்ந்திடினும் புறந்தள்ளி

கிடைத்தெல்லா வாய்ப்பும்பறிபோக பரிதாபம்!

விளக்கம்:

உலகம் சுருங்கிவிட்ட இந்தக் காலத்தில், நினைத்த உடனே, பூமியின் மறுபக்க நாடுகளுக்கு விமான பயணம் கிடைத்து விடுகிறது. இந்தியாவின், ஒரு நாளின் அதிகாலையில் கிளம்பி, அமேரிக்காவின் முந்தைய நாளின் இரவில் சென்று சேர்ந்துவிட முடிகிறது? 13 மணி நேரம் மிச்சமாகிவிடுவது போல. இந்த பயணத்தில் நமக்கு கிடைக்கிற நுழைவுச்சீட்டு, போகவும், வரவும் ஆக இணைந்தே கிடைக்கிறது. திரும்பி வர வேண்டிய சீட்டை, கொஞ்சநாள் தள்ளிபோட வாய்ப்பு உண்டு. தகுந்த காரணமென்றால் நீட்டிப்பும் உண்டு.

இந்த உலகில் நாம் பிறந்ததையும், இந்த பயணத்தையும் ஒப்பிட்டுப்பார்த்தால், ஏழை, பணக்காரன், உயர்ஜாதி, தாழ்ஜாதி, மத, இன, மொழி, நாடு எந்த பேதமும் இன்றி, ஒரே நுழைவுச்சீட்டும், முன் தேதி இடப்படாத பயணமுடிவு சீட்டும் உள்ளது என்பது உறுதி. இதுவரை யாருமே அந்த பயணமுடிவு சீட்டை தள்ளிப் போட்டவரும் இல்லை, ரத்து செய்தவரும் இல்லை. அதற்கான அனுமதியும் நம்மிடமில்லை.

ஆனால், பிறந்தோம், வளர்ந்தோம், வாழ்கிறோம், துன்பமும், மகிழ்ச்சியும் பெறுகிறோம். ஏன் இங்கே வந்தோம்? என்பதற்கான பயண நோக்கம் மறந்தோம். இதற்கு சாதகமாக நாமே எதேனும் கற்பித்துக்கொண்டு “இதற்காகவே பிறந்தேன்” என்றும் வாழ்ந்து குழப்பம் கொண்டோம். அவ்வப்பொழுது நோய், நொடி வந்து பயண இறுதியை ஞாபகப்படுத்தியும், அசட்டை செய்தோம். கிடைத்த வாய்ப்பையும் இழந்தோம். அந்தோ பரிதாபமாக ஒருநாள் இதோ வந்தேவிட்டதே என்று அழுகிறோம். இந்த நிலை வருவதற்குள், நான் யார்? என்ற தத்துவத்தில் தன்னை ஈடுபத்தி உண்மை அறிய வேண்டும் என்று இந்தக்கவிதை விளக்கம் அளிக்கிறது.

வாழ்க வளமுடன்.

-----

Present by: