Companion always!

 துணையே எப்போதும்!

வருத்தமும் தடையும் சோதனையும் துன்பமும்

கடவுளே கொடுப்பது என்றேமாயம் வேண்டாம்

பணமும் பொருளும் வாழ்உயர்வும் மகிழ்ச்சியும்

கடவுளிடம் கேட்டுப் பெறலாமெனவும் வேண்டாம்

எதுவுமிங்கே இருப்பில் ஏற்கனவே இருப்பதறிவாய்

எதுவேண்டுமோ அதுவேஅக் காலத்தில் கிடைக்கும்

எண்ணம்சொல் செயலாராய்ந்து அதனால் எழுகின்ற

விளைவறிந்து செயல்படுக எப்போதுமே இறைதுணை!

விளக்கம்:

கடவுள் என்ற ஒரு மதிப்புவாய்ந்த ஒன்றில் நிறைய வேறுபாடுகளோடு, உலக மக்கள் வாழ்ந்து வருகிறார்கள். தன்னை மறந்து கடவுளிடம் வேண்டிக் கேட்பதும், எல்லாம் தானே செய்துவிட்டு கடவுளிடம் மன்னிப்பு கேட்பதும், கடவுளை நம்ப மறுப்பதும், கடவுள் இருந்தாலும் இல்லாவிட்டாலும் நினைத்ததை நான் செய்வேன் என்றும் இருக்கிறார்கள். அப்படியானல் கடவுளை, கடவுள் தன்மையை எப்படி புரிந்துகொள்வது?

இறை ஒருபோதும் நமக்கு குறை வைப்பதில்லை, அதுப்போலவே உருகி வேண்டினால் எதுவும் தரப்போவதும் இல்லை. இதெல்லாம் ஒரு வகையில் மக்களுக்கு நம்பிக்கை வளர்ப்பதற்காக சொல்லப்பட்டது என்றே கருதவேண்டும். ஏனென்றால், ஒரு மனிதன் கருவாக இருக்கும்பொழுதே, இறை காத்து வளர்த்து, குழந்தையாக்கி, தாய் மூலமாக உலகுக்கு தருகிறது. அந்த கரு வளரும் சூழல், உணவு, வளர்ச்சி எல்லாமே இயல்பில் இருக்கிறது. அதுபோலவே வளரும் குழந்தைக்கு தேவையான எல்லாமே உலகில் நிறைவாக உள்ளது, ஆனால் அவை காலத்தால் அவ்வப்பொழுது கிடைக்கும் என்பதே உண்மை. கேட்டால் தரும், கிடைக்கும் என்பது உண்மையா பொய்யா என்பது அவரவர் அனுபவங்களே சொல்லும்.

ஆனால் தானாக எல்லாம் கிடைக்கும் என்பதற்காக, கடமையை செய்யாதிருத்தல் ஏமாற்றத்தைத்தான் தரும். அப்படியானால், தன்னுடைய எண்ணம், சொல், செயல் ஆகிய இம்மூன்றிலும், எழுகின்ற விளைவு, தனக்கும், பிறருக்கும் நன்மை அளிக்கிறதா?! என்பதை நன்கு ஆராய்ந்து செயல்பட்டால் எப்பொழுதுமே இறை நமக்கு துணையாக இருப்பதை உணர்ந்துகொள்ளலாம் என்ற உண்மையை இந்தக்கவிதை நமக்கு விளக்கம் தருகிறது.

வாழ்க வளமுடன்.

-----

Present by: