Do not Challenge, Do Plan

 சபதம் வேண்டாம் திட்டம் வேண்டும்!

எதையும் விட்டுவிட சபதம் வேண்டாம்!

எளிதில் திருந்தி வாழவே திட்டமிடுவீர்

இதனால் இப்படி அப்படி ஆகிற்றென்று

பட்டியல் இட்டே தேர்வீர் பிரித்தாய்வீர்

உடலுக்கும் உயிர்க்கும் மனதிற்கும் ஏது

தீராத பிரச்சனை நோய்தனை தருமோ

அதை அக்கணமே கைவிட உறுதிஏற்பீர்

தனக்கும் பிறர்க்கும் நலமே எண்ணுவீர்!

விளக்கம்:

புதிய ஆண்டு, அடுத்த சூரிய உதயத்தில் மலர்கிறது. ஆனால் ஆங்கில முறைப்படி நள்ளிரவு 12 மணிக்கு புதிய நாளாக அறிவிக்கிறார்கள். உலகம் முழுதும் அதுதான் பின்பற்றவும் செய்கிறார்கள். ஒரு நாள், இரவு விலகி புதிய வெளிச்சம் கொஞ்சம் கொஞ்சமாக வருவதை எடுத்துக்கொண்டால், ஏன் அந்த விடியற்காலையை ஒரு நாளின் தொடக்கமாக ஏற்றுக்கொள்ளக் கூடாது என்றுதான் தோன்றுகிறது. தமிழர்களின் வாழ்வியலில், சூரிய உதயமே ஒரு நாளின் தொடக்கமாக இருப்பதை அறியலாம். இதுவே ஜோதிட கணக்குகளிலும் பின்பற்றப்படுகிறது.

இந்த நாளோடு இதை செய்யமாட்டேன், அதை செய்யமாட்டேன் என்று சிலர் சபதம் கொள்வார்கள். அதாவது ஆண்டின் இறுதி நாளில், தான் திருந்து வாழப்போவதாக சபதம் ஏற்பார்கள். ஆனால் மறுநாளும் வழக்கம் போலவே அந்த புதிய நாள் கடந்துவிடும். வெகு சிலரே நினைத்தை நிறைவேற்றுவார்கள் எனினும் காலப்போக்கில் அந்த உறுதி குலைந்துவிடும். இதுபோல சபதம் எடுக்க வேண்டியதில்லை. பிறகு எப்படி செய்யலாம்?

உங்களை நீங்கள் மாற்றிக்கொள்ள வேண்டும் என்று விரும்பினால், எனது வாழ்க்கை இந்த இந்த காரணங்களால் பாதிக்கப்படுகிறது என்று ஆராய்ந்து பார்த்து பட்டியலிட வேண்டும். என்மூலமாகவா, பிறர் மூலமாகவா என்பதை தெளிவுபடுத்திக் கொள்ள வேண்டும். எந்த பழக்கம் நம் உயிருக்கும், உடலுக்கும், மனதிற்கும் பிரச்சனை தருகிறதோ அதை கைவிட வேண்டும், தவிர்க்க வேண்டும். மேலும் எந்த ஒரு எண்ணமும், செயலும் தன்னையோ, பிறரையோ பாதிக்காத வகையில் விழிப்புணர்வோடு செயலாற்ற உறுதி எடுத்துக்கொண்டால் போதுமானது. வேறு எந்த வகையிலும் சபதம் தேவையில்லை என்று இந்தக்கவிதை விளக்கம் அளிக்கிறது.

வாழ்க வளமுடன்

-----

Present by: