Egoism doesn't help!

 தன்முனைப்பு உதவாது!

பிறப்பு எல்லா உயிர்களுக்கும் பொதுவானதே

வள்ளுவர் குறள்மொழி, அறிவிலுயர் மனிதர்

வாழ்வும் இறப்பும் அவரவர் வினைசெயலாலே!

இயல்பில் எல்லாம் இருந்தும் தான்தனதென்னும்

நோக்கில் பொதுநலம் கருதாது வாழ்வதாலே!

தன்பிறப்பின் நோக்கம் கடமை அதைமறந்தே

தனியனாய் வாழமுற்பட்டு இழப்பான் தன்னுயிர்!

திருத்திட ஒரேவழி தகுந்தகுருவைச் சரணடைதல்!

விளக்கம்:

தமிழ் நல்லுலகம் நமக்குத்தந்த ஆசான் திருவள்ளுவர், பொருட்பாலில், பெருமை எனும் தலைப்பில், 972வது குறளாக, பிறப்பொக்கும் எல்லா உயிர்க்கும் என்று அறிவுறுத்துகிறார். நாம் ஏதோ, மனிதன் மட்டுமே சிறப்புத் தகுதி பெற்றதாக நினைக்கிறோம் அல்லவா? அது தவறு. ஆனால் மனிதனக்கு 6ம் அறிவாக சிந்தனை அறிவு இருக்கிறது என்பதை ஏற்றுக்கொள்ள வேண்டும். பிறப்பு ஒன்றாக இருந்தாலும், மனிதர்கள் ஒவ்வொருவரின் வாழ்வும், இறப்பும் வேறுவேறு விதமாக அமைந்திருக்கிறது. ஏன்? அது அவர்களின் வினைச் செயல்களால் பிணைக்கப்பட்டிருக்கிறது. 

ஒரு மனிதனுக்கு, இயல்பாக என்ன கிடைக்க வேண்டுமோ, அது வழங்கப்பட்டிருக்கிறது. தகுந்த காலத்தில் அவனுக்கு எல்லாமே கிடைக்கும், இது இயற்கையின் நியதி. ஆனால் மனிதன், போராடித்தான் பெற வேண்டும் என்ற நோக்கில், தான், தனது என்ற தன்முனைப்பால் பொதுநலம் கருதாது தன்னை மட்டும் காப்பாற்றிக் கொள்ள நினைத்து வாழ்கிறான்.

மேலும், தன் பிறப்பின் நோக்கமும், கடமையும் மறந்துவிடுகிறான். உலக இன்பங்களை அனுபவிக்கவே பிறந்தேன் என்பதாக கருதி, வாழ்ந்து, திருப்தி இல்லாமலேயே தன்னுயிர் இழக்கிறான். இதில் ஒரு மனிதன் விழிப்புணர்வு பெற்று, தன்னை சரி செய்துகொள்ள நினைத்தால், அவனுக்கு தன் வாழ்நாளில் கிடைக்கும் ஒரே வழி, தகுந்த குருவை சரணடைதல் மட்டுமே என்று இந்தக்கவிதை விளக்கம் அளிக்கிறது.

வாழ்க வளமுடன்

-----

Present by: