Eternal is about knowing oneself by Yoga!

தன்னை அறிவதே வீடுபேறு!

ஞானியும் இறப்பார் யாவரும் இறப்பார்

என்பதே படைப்பின் தத்துவம் இதனிலே

தப்பிப்பார் யாருளர்? என்றே பொய்மை

கருத்தால் மக்களின் வாழ்வே சிதைந்தது!

இயற்கை பரிணாமத்தில் உச்ச படைப்பே

மனிதன், அவனுள்இறை உண்மை இதுவே!

தன்னை அறியவே பிறந்தான் அறிந்தால்

இறப்பேது பிறப்பேது அதுவே வீடுபேறாம்!

விளக்கம்:

யோகம் என்கிற ஞான மார்க்கம், பெரும்பாலான மக்களுக்கு கிடைக்கவில்லை. தனக்கு சுலபமான பக்தியிலேயே இருப்பது, போதுமானதாக இருக்கிறது. தான் மட்டுமல்லாமல், பிறக்கின்ற தன் சந்ததியினருக்கும், பக்தியே போதும், யோகம் வேண்டியதில்லை என்றே கருதுகின்றனர். இந்த மக்களை வழி நடத்திவரும் சிலர், அந்த பக்தி நிலையிலேயே இருக்க வலியுறுத்துகின்றனர். இதற்கு அவர்கள் சொல்லும் விளக்கம், ஒரு ஞானியும் கடைசியில் இறந்துதான் போவார், இறை வணங்காதோரும் இறந்துதான் போவார். ஆனால் பக்தியில் இறைவனை தொழுதால், இறை மலரடி சரணடையலாம் இதுவே படைப்பின் தத்துவம் என்று சொல்லுவார்கள்.

படைப்பு தத்துவம் என்பது பொய்மை. இயற்கையின் பரிணமாத்தில் மலர்ந்த உச்சமே மனிதன், மனம்+இதன் என்று குரு மகான் வேதாத்திரி மகரிசி சொல்லுகிறார். தன்னை உணர்ந்துகொள்ளும் பொருட்டே மனிதனாக மலர்ந்தான். அதனால்தான் அவனுள் இறை, கடந்து உள்ளே சென்றால் காட்சியாகிறது.

“நான் யார்?” என்று யோகத்தின் வழியாக, பிறப்பின் கடமை உணர்வதே ஒவ்வொரு மனிதனுக்கும் ஆனதாகும். அப்படி தன்னை அறிந்து, இறை உண்மை விளக்கம் பெற்றால், இறப்பும் இல்லை, பிறப்பும் இல்லை அதுவே வீடுபேறு என்ற சித்தர்களின் நிலையாகும். என்ற உண்மையை இந்தக்கவிதை விளக்கம் அளிக்கிறது.

வாழ்க வளமுடன்

-----

Present by: