Final is the beginning of new one

இறுதி மற்றொன்றின் தொடக்கம்!

இறுதியென்று ஏதுமில்லை அதுவும்

மற்றொன்றின் தொடக்கமே ஆகும்

வாழ்நாளில் நடப்பதெல்லம் இறுதி

என்றேஎண்ணி தயங்கிடுதல் ஆகா!

கடந்ததோடு பிண்ணிப் பிணைந்தே

மனம்செய்யும் மாயாஜாலம் ஆகுமே!

நிகழ்கால நடப்பினில் கவனம்வைக்க

வரும்காலம் புதிதாயினிதாய் அமையும்!

விளக்கம்:

மனிதர்களில் சிலர் தன் வாழ்வில், தான் திட்டமிட்டபடி நடக்கவில்லை என்றால், அவ்வளவுதான் என் வாழ்க்கை முடிந்தது, இனி எழுவதற்கு வழி இல்லை. இனி நான் கஷ்டப் படப்போகிறேன் என்பதாக வருந்துவார்கள். மாணவர்கள் தேர்வில் மதிப்பெண் குறைவதும், தேர்ச்சி பெறாமல் இருப்பதையும் கண்டு வருந்தி, என் எதிர்காலமே கேள்விக்குறி ஆகிவிட்டது, இனி நான் வாழ்ந்து என்ன பயன்? இந்த உலகுக்கு பாரம் என்று எண்ணி உயிரையும் மாய்த்துக் கொள்கின்றனர். இப்படியான குழப்பங்கள், முடிவுகள் தேவையில்லை.

ஓன்றின் முடிவு, மற்றொன்றின் ஆரம்பமே. இதுதான் இறுதி என்று எதுவுமே இல்லை. பரிணாமத்தில் ஒன்றிலிருந்து ஒன்றாக மாறிக்கொண்டே இருப்பதுதான் இயற்கையின் விதி ஆகும். உலகில் ஒவ்வொருவருக்கும் இது பொதுவானதே.  தனித்தனியான திறமைகள் ஓவ்வொருவருக்குள்ளும் ஒளிந்து கிடக்கின்றன. அந்த திறமைகளின் வழியில்தான் மாற்றங்கள் நிகழும். இதை ஏற்றுக்கொள்ள பழக வேண்டும்.

நேற்று நடந்ததோடு உங்களை சிறை வைப்பது மனம் நிகழ்த்தும் மாயாஜாலமாகும். நேற்று என்பது நேற்றோடு போயிற்று என்பதை யாரும் ஒப்புக்கொள்வதில்லை. இன்றைய புதிய நாளையும் நேற்றைய நிகழ்வோடு இணைத்து வருந்துவதில் என்ன லாபம் இருக்க முடியும்?!

இந்த நாள், இந்த நொடி நான் புதிது, நான் சந்திப்பதும் புதிது, எனக்கு நடப்பதும் புதிது என்ற கவனமான, விளக்கமான மன நிலைக்கு நாம் உயரவேண்டும்.  அப்பொழுதான் நடக்கும் நாள் புதிதாகவும், இனிதாகவும், கனவுகளை, திறமைகளை மெய்ப்பிக்கும் நாளாக அமையும் என்று இந்தக்கவிதை உண்மை விளக்கம் அளிக்கிறது.

வாழ்க வளமுடன்

-----

Present by: