Live away from the depression and anxiety of the mind!

 மனதின் குழப்பம் கவலை நீங்கி வாழ!

மனதின் குழப்பம் நீங்கிடவும்

கவலை ஒழித்து வாழ்ந்திடவும்

நமக்கு இருக்கும் ஓர்எளியவழி

நடந்த தவறுகளை ஆராய்தலே!

இனியும் இத்தவறு நேராதவாறு

ஏற்றுக் கழித்திடவே தயாராவீர்

இதுவரை செய்ததில் திருத்தம்,

இனிமேல் செய்வதில் விழிப்பு!

தன்மேல் பிறர்மேல் பழிவேண்டா!

விளைவு அதுஇறை கொடுத்தது!

விளக்கம்:

உலகில் வாழும் எந்த மனிதருக்கும், எந்த வயதினருக்கும் மனக் குழப்பம், மனக் கவலை என்பது இருக்கிறது. உலகம் விஞ்ஞானத்தால் சுருங்கி கையடக்கத்தில் வந்துவிட்டாலும், மனதை செம்மை செய்ய வழி இல்லை. முன்னெப்போதும் விட அதிகமாகவே குழந்தைகள், இளைஞோர்கள் இந்த மன வேதனையில் சிக்கித் தவிக்கிறார்கள். வயதானால்தான் குழப்பமும், கவலையும் வரும் என்ற கருத்து இப்பொழுது காலாவதி ஆகிவிட்டதே!

இதெல்லாம் ஏன் வருகிறது? ஏன் இந்த மனக் குழப்பம், மனக் கவலை என்று வருத்தப்பட்டு மேலும் வாழ்வை வீணாக்கிக் கொள்ளக் கூடாது. தினம் தினமும் தானாகவோ, பிறரிடமோ புலம்பிக் கொண்டிருக்கக் கூடாது. பெரும்பாலும், பிறரிடம் சொல்லுவதால் பாரம் குறையும் என்பார்கள், அதாவது அங்கே ஒரு அலசல், கருத்துப் பரிமாற்றம் ஓரளவு உதவும். ஆனால் மனக்குழப்பம் நீங்கிட, மனக்கவலை ஒழிக்க நடந்த தவறுகளை ஆராய்ந்து, அங்கே திருத்தம் பெற்று இனி அந்த தவறுகளை செய்யமாட்டேன் என்ற விழிப்புணர்வு வேண்டும்.

ஏதோ ஒருவகையில் இப்பொழுது அனுபவிக்கும் மனக் குழப்பம், மனக் கவலை ஏற்று தீர்வு காண வேண்டும். தன் மீதோ, பிறர் மீதோ பழி போடுதல் மேலும் ஒரு புதிய துன்பத்திற்கு வழி வகுக்கும். 

எந்த ஒரு செயலையும் ஆரம்பிக்கும் பொழுது, குறை சொல்ல முடியாது. ஆனால் இதைச் செய்தால் என்ன ஆகும்? என்ன விளைவைத் தரும்? எனக்கு பாதிப்பா? வாழ்க்கைக்கு பாதிப்பா? என்ற சிந்தனைகள் தான் விளைவு குறித்து விளக்கம் தரும். விளைவு குறித்து யோசிக்காத செயலில், விளைவாக வருவது இறை தந்ததே ஆகும். எனவே செய்ததில் திருத்தமும், இனிமேல் செய்வதில் விழிப்புணர்வும் வேண்டும் என்று இந்தக்கவிதை உண்மை விளக்கம் அளிக்கிறது.

வாழ்க வளமுடன்

-----

Present by: