Punishment for violating natural!

 இயல்பு மீறினால் தண்டனை!

இயல்பு என்றஇயற்கைத் தன்மை அதையே

சூழ்நிலை என்றே மாற்றிக் கொள்வதும்

மீறுவது என்றே மாற்றிச் செய்வதுமே

நாம்நம் வாழ்வில் பெற்ற துன்பத்தின்வழி!

இயல்பு என்பதும் இயற்கை என்பதும்

ஒன்றேயாம் அதையறிந்து ஒன்றி செய்க!

இதற்கு ஒவ்வாத நம்செயல் அனைத்தும்

திருத்திட நேரும் எதுவும் துன்பமேதான்!

விளக்கம்:

இயல்பு என்ற ஒரு வார்த்தை அடிக்கடி கேட்டிருப்பீர்கள். இயல்பு என்பது தன்மையாக இருக்கும். ஒரு விதையின் தன்மை அதில் அடங்கி இருக்கும், மண்ணில் விதைத்து, நீர் ஊற்றி காத்துவளர்த்தால், காலத்தில் அது மரமாகி உயர்ந்து நிற்கும். காய் தரும், கனி தரும், மீண்டும் விதையும் தரும். அதுவே அதன் இயல்பு. இந்த இயல்பு இயற்கையின் ஒத்ததன்மை என்றும் சொல்ல முடியும்.

ஆனால் மனிதன், தன் ஆறாவது அறிவின் உயர்வை பெற்றவன். ஏன்? எதற்கு? எப்படி? என்று சிந்திக்கும் ஆற்றல் கிடைக்கப் பெற்றவன். இந்த ஒரு காரணத்தினாலேயே, இயல்பு என்பதை சரிவர புரிந்து கொள்ளாமல், அதுகுறித்து சிந்திக்காமல், அந்த இயல்பை தனக்கு தகுந்த முறையில் மாற்றிக்கொள்ள முயற்சிப்பான். அந்த இயல்பை மீறி செயல்படவும் முனைவான். இதனால் அவனுக்கு பெரும்பாலும் வெற்றி கிடைப்பதுபோல இருந்தாலும், நாளைடைவில் அது துன்பமாக மாறி அவனை வருத்தும். இது ஏன்?

ஏற்கனவே இயல்பு என்பதும் இயற்கை தன்மை என்பது ஒன்று என பார்த்தோம். எனவே அதை மாற்றினாலும், மீறினாலும், அந்த இயல்பு தன்மையே தானாக சரிசெய்துகொள்ள முயற்சிக்கிறது. அதன் நாம் செய்ததால், நம்மையும் திருத்த துன்பத்தை தருகிறது. இதை அறிந்து இயல்பு என்பதோடு ஒன்றினைந்து நம் செயல்கள் அமையவேண்டும், அமைத்துக்கொள்ள வேண்டும் என்று இந்தக்கவிதை உண்மை விளக்கம் அளிக்கிறது.

வாழ்க வளமுடன்

-----

Present by: