What is Kundalini in yoga?

 குண்டலினி என்பது என்ன?

குண்டலினி என்பது ஓர்மாய பொருளல்ல

உடலூடும் மனதின் சிறப்பு பெயராகும்

உடல்நடு மூலாதர வித்திலே மையமாகும்

உணராத நிலையில் தன்னிலை மறக்கும்!

குருதொட்டு எழுப்பிட உண்மை உணரும்!

உயர்ந்த குண்டலினி ஆக்கினை நிலைக்க

உடலுக்கும் மனதிற்கும் ஓர்மை கிடைக்கும்,

எதுவேண்டும் வேண்டா என்ற தெளிவாகும்!

விளக்கம்:

யோகத்தில் முதன்மையாக நாம் தெரிந்து கொள்வது, குண்டலினி சக்தி என்பதாகும். தமிழோடு பல மொழி கலப்பில், சமஸ்கிருதமும் ஒன்று. இது யோகத்திலும் கலந்திருக்கிறது. சில மறைமுகமாக சொல்லுவதாகவும் அமையும். குண்டலினி என்பதன் தெளிவான விளக்கம், “மனோசக்தி” என்பதுதான். அதை வளப்படுத்த வேண்டும் என்பதன் பொருளாகவே, “மனவளக்கலை” என்று குருமகான் வேதாத்திரி மகரிசி அவர்கள், மக்களுக்கு வழங்க தயாரானார்.

உடலோடு, புலன் ஐந்தோடும் கலந்திருக்கும் மனதின் சிறப்புப் பெயரே குண்டலினி. எந்த பொருளுக்கும் ஓர் மையப்புள்ளி அமைதிருக்கும். இந்த உடலுக்கும் ஓர் மையப்புள்ளி, மூலாதாரம் என்ற இடமாகும். இதே இடத்தில்தான் வித்து சக்தியும், உயிர் சக்தியும் மையம் கொண்டுள்ளது. மூலாதாரத்தில் இருந்துதான், குரு தன் சக்தியால், குண்டலினியை தொட்டு எழுப்பி, ஆக்ஞை என்ற புருவ மத்திக்கு ஏற்றி வைக்கிறார். இதுவே தீட்சை ஆகும். இறை உணர்தலின் முதல் படி.

மூலாதாரத்திலேயே குண்டலினி இருக்குமானால், உலக இன்பங்களில் மூழ்கிவிடுவோம். “நான் யார்?” என்ற உயர்ந்த சிந்தனை எழ வாய்ப்பில்லை. எனவே குருவின் உதவியால் குண்டலினி சக்தி ஆக்ஞை உயர்த்தி தவம் செய்திட, மனம் விழிப்புநிலை கிடைக்கும். உடலோடு ஓர்மை நிலை உண்டாகும். எது வேண்டும், வேண்டாம் என்ற தெளிவும் மனதிற்கு கிடைக்கும். இத்தகைய உண்மைகளை இந்தக்கவிதை விளக்குகிறது.

வாழ்க வளமுடன்.

-----

Present by: