The true explanation of thuriyatheetha meditation!

 துரியாதீதம் தரும் உண்மை விளக்கம்!

துரியாதீதம் உச்சத்தின் உச்ச தவமாம்

உண்மை மெய்பொருள் இதோ அருகே!

பொருளைத் தேடிபோய் அப் பொருளாய்

மாறிடும் அற்புத வித்தை நிகழ்ந்திடும்

மனதைக் கொண்டே விரிந்திட விரிந்திட

மனமற்ற ஓர்நிலை விழிப்புடன் அறிக!

இருப்பதுவே இங்கே இருப்பதை உணர்க!

பிறப்பின் கடமையில் முழுமை பெற்றிடுக!

விளக்கம்:

குண்டலினி யோக சாதனையில், துரியம் உச்சம் என்றால், குருமகான் வேதாத்திரி மகரிசி அவர்கள் தந்த துரியாதீதம் உச்சத்தின் உச்ச நிலைதவம் எனலாம். குறுகிய காலத்தில், இதுதான் என்ற மெய்ப்பொருள் உண்மையை, “உனக்கு வழி எதுவென்றும், உண்மை எதுவென்றும் காட்டிவிட்டேன். இனி நீ உணர்ந்து அறிந்துகொள்” என்று, துரியாதீத தீட்சை கொடுத்து விடுகிறார். அதற்குப் பிறகு நாமே முயன்று, அடிக்கடி இத்தவம் நிறைவேற்றி செய்துவர, நமது முயற்சி, ஆர்வம், செயல்வடிவம் கூடக்கூட உண்மையை நெருங்கிவிடலாம்.

துரியாதீத்தில், மெய்ப்பொருளை தேடிப் போக, தேடும் நபரே அப்பொருளாக மாறிடும் அற்புத வித்தை  நிகழும். மெய்ப்பொருளை மனதால் தான் அறிய முயற்சிக்கிறோம். மனம் தவத்தில் விரிய விரிய, மனமற்ற ஓர் நிலையில், மெய்ப்பொருளோடு கலந்து நிற்கும் நிலையை நாம் விழிப்புணர்வோடு பெறலாம். மெய்ப்பொருளாக இருப்பது எதுவோ அதுவே இங்கும், அங்கும், எங்கும் இருப்பதையும் உணரலாம். இதனால் நாம் இந்த உலகில் பிறவி எடுத்ததின் கடமை, இங்கே முழுமை பெற்றதை நினைந்து மகிழலாம் என்பதாக இந்தக்கவிதை உண்மை விளக்கம் அளிக்கிறது.

வாழ்க வளமுடன்.

-----

Present by: