Watch out of the mind with consciousness!

 மனதை அறிவால் கவனிப்பீர்!

இன்னமும் வேண்டும் என்பதற்கும் இதுவேபோதும்

என்பதற்கும் மனதின் அனுபவமே காரணமாகும்!

போதுமென்பது நிறைமனம் வேண்டுமென்பது குறை!

மனதின் அறிதலிலும் அநுபோகத்திலும் அனுபவத்திலும்

நம்அறிவை மனதோடு பிணைசெய்க ஒன்றாயுணர்க!

மனதோடு அறிவுஒன்றிடாத செயலனைத்தும் புரிந்திடா!

நம்வாழ்வில் ஏற்றபல சிக்கலுக்கும் காரணமிதுவே!

விழிப்போடு இருந்துமனம் நடவடிக்கை பிரித்துணர்வீர்!

விளக்கம்: 

மனம், அறிவு என்ற இரண்டு பொருள் குறித்து இந்த கவிதையில் பார்க்கிறோம். அறிவு என்பதை கற்றறிவு, அனுபவ அறிவு, சிந்தனை அறிவு என்பதாக எடுத்துக்கொள்ள முடியாது. அதுவும் அறிவுதான் எனினும், இங்கே அறிவு எனப்படுவது, நம்முடைய விழிப்பு நிலையை குறிக்கிறது.

ஒருவர் தனக்கு இன்னமும் வேண்டும் என்று விரும்புவதற்கும், இதுவே போதுமானது என்பதற்கும் காரணம் அவர்களின் மன நிலையே ஆகும். போதும் எனும்பொழுது அது நிறை மனமாகவும், இன்னும் வேண்டும் எனும்பொழுது அது குறை மனமாகவும் உள்ளது. ஏன் இத்தகைய நிலை? ஒருவருடைய மனம், அறிதலிலும், அநுபோகத்திலும், அனுபவத்திலும் ஒட்டுதல் இல்லாது உணர்வாக கிடைக்கிற நிலையாகும்.

உதாரணமாக, ஒரு சாப்பாட்டை உணர்ந்து, ருசி அறிந்து, பொறுமையாக சாப்பிடுகையில், மிகப்பெரும் திருப்தி ஏற்பட்டுவிடும். ஆனால் வேறு எதோ நினைவில், அவசரமாக, ருசி உணராமல் சாப்பிட்டால் என்ன சாப்பிட்டோம் என்பது கூட நினைவில் நிற்காது. ஏனென்றால் நம் கவனம் அங்கே இல்லை. நம் அறிவை அந்த சூழலோடு நிறுத்தவில்லை என்பது காரணமாகும். எனவே மனதோடு அறிவு ஒன்றிடாத எண்ணம், சொல், செயல் அனைத்தும் புரிந்திடாது.

நம் வாழ்வில் இதுவரைக்கும் ஏற்பட்ட பலவிதமான சிக்கல்களுக்கும் காரணம் இதுதான் என்பதை இப்போது நீங்கள் புரிந்திருக்கலாம். எனவே இனிமேலாவது விழிபோடு இருந்து, மனதோடு மனம் போன போக்கில் போகாது, நடவடிக்கைகளில் பிரித்து நின்று திருத்தம் செய்துகொள்வீர் என்பதாக இந்தக்கவிதை விளக்கம் தருகிறது!

வாழ்க வளமுடன்

-----

நன்கொடைகள் (Donate) வழங்க:

GPay: 9442783450@okhdfcbank
WhatsApp: 9442783450.wa.qvi@wahdfcbank
Bhim UPI: 9442783450@upi
PhonePe: 9442783450@ybl

Present by: