You will be curious to know the whole mind!

 மனதை முழுதாக அறிய ஆர்வம் கொள்வீர்!

மனமொன்றை அறியாதோர் யாருமே இல்லை

மனமென்பதை முழுதாய் அறிந்தோர் இல்லை

எல்லைகளற்று விரிவதே மனது என்றாலுகூட

காலம் தூரம்பருமன் வேகம் இவையில்லாது

காட்சிப் படுத்தி உணர்வதற்கு ஆற்றலில்லை!

எனினும்மனதின் உயர்வே மனிதனின் உயர்வாகும்

தன்மனதின் மதிப்பே மனிதனின் மதிப்பாகும்

மனதின் பெருமையே மனிதனின் பெருமையாம்!

விளக்கம்:

உலகில் உள்ள எந்த மனிதரிடம் கேட்டாலும், மனம் என்பது குறித்து அறிந்திருக்கிறேன் என்று சொல்லுவார்கள். பன்னெடுங்காலமாக மனம் என்ற வார்த்தை அவர்களோடு கலந்து வந்திருக்கிறது. ஆனால் மனம் என்பது என்ன? என்ற ஆராய்ச்சிக் கேள்விக்கு பதில் சொல்ல, மனதை முழுதாக அறிந்தோர் யாருமில்லை, ஒரு சில ஞானியர்களைத் தவிர.

எல்லைகளற்று மனம் விரியும் என்பது பொதுவான கருத்தாக இருப்பினும், மனம் 1) காலம் 2) தூரம் 3) பருமன் 4) வேகம் என்ற வரைமுறைக்குள் மட்டுமே தன் உணர்வைப்பெறும். நமது தற்கால விஞ்ஞானம் கூட, இந்த நான்கிற்குள் அடங்குபவை மட்டுமே ஏற்றுக்கொள்கிறது. அதனால்தான் அனுபவபூர்வமான சான்று (empirical proof) தேவை என்கிறது. இவை இல்லாத ஒன்றை, அது தெய்வமாகவே இருந்தாலும் ஏற்றுக் கொள்வதில்லை. இதன் காரணமாகவே “கடவுள் இல்லை” என்பது பரவலாகிவிட்டது. வெறும் நம்பிக்கைக் கடவுள் இல்லை, ஆனால் மெய்ப்பொருள் என்ற ஒன்று இருக்கிறதே?

இத்தனை குழப்பங்கள் இருந்தாலும் கூட, மனதை சரியானபடி பழக்காவிட்டால், மனிதனும் பாதிக்கப்படுகிறான். மனதின் உயர்வே மனிதனின் உயர்வாகும்.

தன்னுடைய மனதின் மதிப்பே மனிதனின் மதிப்பாகும். மனதின் பெருமையே மனிதனின் பெருமையாகவும் அமைந்துவிடுகிறது. என்பதான உண்மையை இந்தக்கவிதை நமக்கு விளக்குகிறது.

வாழ்க வளமுடன்.

-----