Do you know the thought arising out of habit?!

பழக்கத்தால் எழும் எண்ணம் அறிவோமா?!

நாம்செய்யும் ஓர்செயலை தொடர்ந்து செய்தால்

அதுவழக்கம் என்றாகும் அதுவே இன்னும்தொடர

பழக்கமாம், செயலிலும் வழக்கத்திலும் நாம்கூட

இருப்போம் பழக்கமென்ற நிலையில் நாமில்லை

தானாகஉடல் இயங்கமூளை மனம்மயங்கி செயல்

நடைபெறும் இன்பமோ துன்பமே இரண்டும்வரும்!

விழிப்பாக இருந்துபழக்கம் மாற்றிட எளிதுதான்

நல்லதொரு பழக்கத்தால் ஆராய்ச்சி கொண்டே!

விளக்கம்:

ஒரு நிறுவனத்தில் வேலைபார்த்துக் கொண்டு இருக்கும் அன்பர், மதிய உணவு இடைவேளை மணி ஒலித்ததும், சாப்பிடுவதற்காக, வேலைகளை நிறுத்தி வைத்துவிடுவார். ஆனால் உண்மையிலேயே பசி இருக்கிறதா என்றால், தனக்கு இல்லை என்கிறார். காரணம் தொடர்ந்து ‘இந்த நேரத்தில்’ சாப்பிட்டு பழக்கமானதுதான் காரணம். கைபேசி வைத்திருப்பவர்கள், தொடர்ச்சியாக ஒரு 10 நிமிடம் கூட பார்க்காமல் இருக்கமாட்டார்கள் என்பதும் பழகிவிட்ட நிலையில்தான்.

ஒரே மாதிரியான ஒரு செயலை செய்துவந்தால் முதலில் வழக்கம், பின்னாளில் அந்த வழக்கம், பழக்கமாகிவிடும். இதில் முக்கியான ஒரு மாறுதலை, நம்முடை தொடர்பை கவனிக்க வேண்டும். செயல் செய்யும்பொழுது நாம் அங்கே இருப்பாக உள்ளோம். அதாவது நம்முடைய நினைவில், கவனத்தில் அந்த செயல் நிகழும். வழக்கம் என்றபோது இயல்பாக நாம் செயல்படுவோம். ஆனால் பழக்கம் என்றாகிவிட்டால், அது தானாகவெ நிகழும் செயலாகும். இங்கே நம்மால் நம்மை கட்டுப்படுத்த முடியாத நிலையும் உருவாகிவிடும்.

இதனால்தான் குழந்தைகளின் கணிணி, கைபேசி விளையாடுக்களில் இருந்து அவர்களை பிரிக்க திணறுகிறோம். நாமும் கூட கைபேசி உபயோகத்தில் சிக்கி விடுகிறோம். குடிப்பதை நிறுத்திய ஒருவர், தானாகவே மறுபடி கடைக்குள் நுழைந்து குடித்துவிட்டு வருவார். கேட்டால் என்னை அறியாமல் சென்றுவிட்டேன் என்பார்.

பழக்கத்தால் வரும் எண்ணம், நல்ல விளைவைத் தருவதும் உண்டு. அதிகாலை 4:30 மணிக்கு எழுந்து காயகல்பம், உடற்பயிற்சி, தவம் செய்யும் பழக்கமும், அதனால் எழும் எண்ணங்களும் நன்மையே தரும். தவறான எண்ணங்களைத் தரும் பழக்கத்தில் இருந்து விடுபட, நாமே விரும்பி நல்ல எண்ணங்களை, செயலைக் கொண்டு மாற்றிக்கொள்ள வேண்டும். அது எளிமையானதும் கூட. ஒரு எண்ணம் எழும்போது, இது பழக்கமா என்பதை ஆராய்ந்தால் போதுமானது! என்று இந்தக்கவிதை, பழக்கத்தால் எழும் எண்ணங்களைப் பற்றி சொல்லுகிறது!

வாழ்க வளமுடன்.

-

நன்கொடைகள் (Donate) வழங்கி ஊக்கப்படுத்தலாமே?!:

GPay: 9442783450@okhdfcbank
WhatsApp: 9442783450.wa.qvi@wahdfcbank
Bhim UPI: 9442783450@upi
PhonePe: 9442783450@ybl

Present by: