Move Towards Source

 மூலம் நோக்கி நகர்தல்!

நீர் எந்த வடிவிலிருந்தாலும்

தன் மூலம் நோக்கிநகரும்

அதுகுறித்தே இயல்பாய் துடிக்கும்

அதுவரையில் பாத்திரத்தின் வடிவெடுக்கும்.

இயல்புமீறி அதை தேக்கி,

அணை குளம்குட்டை ஏரியாக்கி

பயன்பெறலாம் ஓரளவில். ஆனாலும்,

உடைத்து வீறுநடை போடும்

ஓடை வாய்கால் பெரும்ஆறாய்.

ஒன்றான அண்டபிண்டம் அறிவோம்,

நாமும் புலன்வழி ஓடுகிறோம்.

பெற்ற உணர்வுவழி மயங்கினோம்.

மூலம் நோக்கி அறிந்துநகராமல்,

உடல்மன உயிர்செயல் முரண்பாட்டில்.

சிக்கி சிதைந்து சின்னாபின்னமாகி

தெறித்து சிதறினோம் மூலமெங்கே!

நீருக்கு மூலமாம் பெருங்கடல்

நமக்கு மூலமாம் பாழுங்கடல் (சுத்தவெளி)

நீரின் பாதை தடுக்காதே

நீயும் பாதை தடுமாறாதே!

விளக்கம்:

நீருக்கு மூலம் நோக்கி நகர்தலே நோக்கமாக இருக்கும். உங்கள் கையிலிருந்து சிந்திய நீர் உடனடியாக, மண்ணில் ஓடும், பிறகு அப்படியே மண்ணில் புதைந்து உள்முகமாக ஓடும். எங்கே செல்லும்? தன் மூலமான கடல் நோக்கி. ஏனென்றால், கடல் நீர் தானே, ஆவியாகி மழையாக பொழிந்தது?! 

மனிதனும் அவ்வாறே, மூலமான சுத்தவெளியிலிருந்து, பரிணாமத்தில் இயற்கையோடு வந்திருக்கிறான். இதனால்தான் அண்டத்திலிருப்பது பிண்டத்திலும், பிண்டத்திலிருப்பது அண்டத்திலும் என்ற உண்மை விளங்கும்.

ஆனால், மனிதன் தன் ஐந்து புலன்களால் திசைமாறி பயணிக்கிறான். தன் மூலம் அறியமுடியாத அந்த சக்தி, தேவையில்லாமல் சிக்கி வாழ்வை சீரக்கிறது. எதிலும் முடிவும் நிம்மதியும் கிடைப்பதில்லை. மூலமும் மறந்திருக்கிறான்.

ஆனால், அவன் இறையாகிய மூலம் நோக்கி நகர்ந்தால் அவன் மனநிறைவும், அமைதியும் பெறுவான். தன் மூலம் அறிந்த மகிழ்வில் பேரானந்தம் அடைவான். வாழ்வின் எல்லா நலனும் கிடைக்கும். பிறவியின் கடனும் அடையும். பிறப்பும் பூர்த்தி ஆகும். 

வாழ்க வளமுடன்!