Do not Expect and Wait

எதிர்பார்த்து காத்திருக்காதே!

எதிர்பார்ப்பது நடக்க வேண்டுமென்றால்

எதிர்பார்ப்பது போல் செய்திருக்கவேண்டுமே!

களிமண்குவித்து சக்கரம் சுழற்றியவன்

கைகளால் விரும்பியதை வடிவமைத்தாலே

மனதில் நினைத்தது பொருளாய்வருமன்றோ?

முன்னும்பின்னும் செய்ததின் எதிர்விளைவாய்

வந்தடைந்த தடையோவரவோ நோக்காமல்

எதிர்பார்த்து காத்திருத்தல் இயற்கைக்குமுரணே!

செயல்விளைவு நீதியொன்று இருப்பதையறிந்தினி

எதிர்பார்ப்பு எதுமின்றி செயல்புரியகற்போமே! 

விளக்கம்:

வாழ்நாளில் எப்போதுமே ஏதேனும் எதிர்பார்த்து காத்திருப்பதே நம் கடமையாகிப் போனது. நல்லது நடக்குமா? தொழில் சிறக்குமா? பணம் கிடைக்குமா? கார் கிடைக்குமா? வீடு அமையுமா? திருமணம் நடக்குமா? இப்படியாக ஏகப்பட்ட எதிர்பார்ப்புக்கள்.

இவையெல்லாம் கிடைக்க இதுவரை நாம் என்னென்ன செய்தோம்? என்று நாம் கேட்டுக்கொள்வது இல்லை. இதுவரை எதிர்பார்த்து நமக்கு என்ன கிடைத்தது என்றும் சிந்திப்பதில்லை.

பானை வடிவமைப்பாளர், மனதில் நினைத்த உருவை, கைகளால் வடித்தால்தான் அது மண்ணில் உருபெற்று நிஜமாக வந்து நிற்கும். சிறிய தவறும் அவ்வடிவத்தை குலைத்துவிடும். இதைப்போலவே நமக்கு என்ன வேண்டுமோ அதுகுறித்து சிந்தித்து, மனதில் நெறிப்படுத்தி செயல் செய்தால் தானாகவே வெற்றி கிடைக்கும். எதிர்பார்த்து ஏமாற வேண்டாம்.

இயற்கையின் செயல்விளைவு நீதி என்று இருக்கிறது. நாம் எந்த செயல் செய்தாலும் அது பிரதிபலிக்கும். ஒருவரிசையும் மாறாமல் விளைவைத் தரும் என்பதை புரிந்து, எதிர்பார்க்காமல் செயல் செய்துவர வெற்றி நிச்சயம்.

வாழ்க வளமுடன்

------

Thanks to image: Google web search, copyright to its owner