Educate Yourself

 நீயே புரிந்துகொள்!

சோகமும் வேதனையும் தேவையில்லை

ஏழையாக இருப்பதும் சாபமில்லை

படிப்பும் பட்டயமும் தேவையில்லை

பொருள் தேடிப்பெற அதுசான்றுமில்லை

இயற்கையே அறிவாய் இருப்பதறிவாய்

அதன்வழி வெற்றிக் கனிபறிப்பாய்.

ஏட்டை படித்தவன் சுருங்கிப்போவான் - ஆனால்

தன்னை படித்தவன் பரந்துவிரிவான் -அவனே

உலகமக்கள் தேவையும் அறிவான்.

எதுதேவை மக்களுக்கு என்றாராய்ந்து

அதுவழி உழைக்க சுபமேயெல்லாம்!

விளக்கம்:
இப்படி ஒரு ஏழைக் குடும்பத்தில் வந்து பிறந்துவிட்டேனே!, என் பெற்றோர் ஏழையாக இருந்தும் ஏன் என்னை பெற்றெடுத்தார்கள்? இப்படி இருப்பதை விட இறப்பது மேல்! என்று பெரும்பாலான இளைஞர்கள் புலம்பித் தவிக்கிறார்கள். மேலும் இவர்களே அந்த ஏழை வீட்டிற்கு சுமையாகவும் ஆகிவிடுகிறார்கள். அடிக்கடி தன் பெற்றோரோடு சண்டையும், சச்சரவுகளும் செய்கின்றனர். 

ஒரு பிறப்பு என்பது இயற்கையாய் நிகழ்வது. மனிதனாக பிறக்க மா தவம் செய்திருக்க வேண்டும் என்பது தெரியுமா? இயற்கை முழுமை அடைவது மனிதபிறப்பிலேதான். மனிதனே தன்னை அறிந்து, இறையையும் அறியக்கூடிய தன்னறிவு பெற்றவன். ஆனால் இப்படியான இளைஞர்கள் சொல்லுவது போல, ஒருவன் ஏழையாக இருப்பது விதி அல்ல. தனக்கு என்ன குறையோ அதை நிறை ஆக்க முயற்சிக்க வேண்டும். 

படிக்க வசதி இல்லை என்றாலும், வருத்தமின்றி, பெற்றோருக்கு துணையாகவும், தனியாகவும் தனக்கு என்ன தெரியுமோ அதைக்கொண்டு, மக்களுக்கு தேவையான உதவிகளை செய்தே சம்பாதிக்க முடியும். வழிகள் ஆயிரம் உள்ளன. உலகை உற்றுநோக்கினால், படிக்காதவர் உருவாக்கிய நிறுவனங்களில், படித்தவர்கள் தன் சம்பளத்திற்காக உழைப்பதை காணமுடியும்.

பணத்தினால் ஏற்படும் வறுமையை மிக எளிதாக சரி செய்யலாம். ஆனால் இளைஞர்களே, அறிவு வறுமையை ஏற்படுத்திக் கொள்ளாதீர் என்பதாக இந்தக் கவிதை விளக்குகிறது.

வாழ்க வளமுடன். 

---------

Photos thanks to: BIGSTOCK