Happiness Everywhere

எங்குமே இன்பம்!

இன்பமே நிறைந்த இவ்வுலகில்

இன்பம் நுகரவே நீபிறந்தாய்

உண்மை அதுவே நீமறந்தாய்

உண்மை அறிதலில் தடையாகவே

உனக்கும் மகனாக நீயேபிறந்தாய்

மகனுக்கும் மகனாக அதேதொடர்ந்தாய்!

பிறக்கும் நோக்கம் தனையறிதலே,

அறிந்தபின் அப்பேரின்பம் திளைக்கவே!

இறப்புபிறப்பில் நிச்சயம் என்றிருக்கையில்

தான்யார் என்றியவே தவத்திலிருப்பாயே!

பிறப்பிடை வாழ்வை வாழ்ந்திருப்பாயே!

விளக்கம்:

மனிதனாக பிறந்ததின் நோக்கம் என்ன என்பதை மிக சிலரே சிந்திக்கிறார்கள். பெரும்பாலானோர், எதோ பிறந்தோம், சாகும் வரை வாழ்வோம் என்று வாழ்கிறார்கள். பொருள் தேடலிலும், குடும்பம், குழந்தைகள் வளர்ப்பிலும் காலம் முழுமை அடைவதும் இல்லை. பிறப்புக்கும் இறப்புக்கு இடையேயான வாழ்வை, தான் யார் என்று “யோகத்தால்” அறிந்து கொண்டால், எல்லாவற்றிலும் நிறைவோடு, மகிழ்வோடு வாழலாம். ஏனென்றால் இந்த உலகில் இன்பமே நிறைந்திருக்கிறது. நாம் ஏற்கனவே செய்த அல்லது நேற்று செய்த செயல்களினால்தான் தவறான விளைவை பெற்று துன்பப்படுகிறோம் அன்றி வேறில்லை.

அதோடு ஒரு பிறப்பில் முடியாத “நான் யார்?” என்ற தேடல் ஒரு பிறப்பில் முழுமை அடையவில்லை என்றால், அடுத்தடுத்து, மகனாக, பேரனாக தொடர்ந்துகொண்டே இருக்கும் என்பதே இயற்கை நியதி. எப்படி மலை உச்சியில் எழும் ஊற்று நீர், பெரும்கடலை அடையாது அமைதி கொள்வதில்லையோ, அதுபோலவே நம் வாழ்க்கையும் என்பதை புரிந்துகொள்ள வேண்டும்.

நாமே நமக்கு உருவாக்கிய சிக்கலில்தான் இந்த உலகில் உள்ள ஓவ்வொருவரும் சிக்கி தவிக்கின்றனர். அன்பும், பண்பும், கருணையும், பணமும், கல்வியும், மனதை அறியும் ஆறாவது அறிவும் இருந்து என்ன பயன்? என்ற சிந்தனைகளை இந்த கவிதை விளக்குகிறது.

வாழ்க வளமுடன்.

------

Thanks to Image by: Pexels and @Andrea Piacquadio