Not necessarily, your choice

உன் தேர்வே, கட்டாயமில்லை!

உண்மை மிகவும் எளியதே!

அறிதலும் உணர்தலும் இயல்பே!

உண்மை மதிப்பை நன்கறிந்தே,

தெய்வம் என்றார் முன்னோர்!

வழியாய் அம்முறை கண்டோர்

அறநெறி செய்தார் மக்கள்வாழ்வை!

இன்பம் துய்த்து நெறியானமுறையும்

இன்பம் துறந்து தெளிந்தமுறையும்

விருப்பமே அன்றி கட்டாயமில்லை!

தேவை இறைநிலை அகலாமனமே!

விளக்கம்:

பிறப்பின் நோக்கம், நான் யார் எனக்கேட்டு, கடந்து உள்ளே சிந்தித்து,  தன்னை அறிதல் என்பதை நாம் அறிவோம். ஆனால் கால சூழலில் மறந்துவிட்டோம். இந்த உண்மைகளை அறிந்து உலகுக்கு எடுத்துச்சொன்ன மகான்கள், சித்தர்கள் “உண்மைத்தன்மையை” அதன் மகத்துவத்தை அறிந்தும், உணர்ந்தும் “தெய்வம்” என்றார்கள். அதாவது எல்லாவற்றிற்கும் மேலானது, முழுமை முதற்பொருள், மெய்ப்பொருள் என்ற விளக்கம் அளித்தார்கள். அதை அறிவதற்கு வழிகளும் சொன்னார்கள். அறியாதோர்க்கு வாழ்க்கை அறநெறிகளை தந்தார்கள்.

எனவே, இறை உணர்தலுக்கான யோகம் தேவையில்லை என்றால், வாழ்க்கையை முறையாய் வாழ்ந்து, தனக்கும், பிறருக்கும் தீங்கிழைக்காத வாழ்வும், துன்பப்படுவோருக்கு உதவி செய்யும் வாழ்வும் போதுமானது என்று அறிவுரை செய்தார்கள். விருப்பம் உள்ளோர் யோகம் கற்றும் தெளிவும் பெறலாம் என்று அதற்கும் வழியாக “தவம்” தந்தார்கள். ஆனால் யாருக்குமே இது கட்டாயப்படுத்தவில்லை என்பதையும் நாம் நினைவில் கொள்ள வேண்டியது அவசியம்.

இந்த அறநெறி வாழ்வு அல்லது யோகம் இரண்டிற்குமே பொதுவான தேவை என்பது “இறைநிலை” மறவாத மனமே ஆகும் என்பதை இக்கவிதை விளக்குகிறது. 

வாழ்க வளமுடன்.