The body does not need medicine alone!

உடலுக்கு மருந்து தனியே தேவையில்லை!

உணவே மருந்தாகும் வித்தை

புதிதாக ஒன்றுமில்லை எளிதே

கைவிரல் ஐந்தும் சேர்த்து

பிசைந்து சாப்பிடும் முன்னம்

மனதை அதில் செலுத்திநில்

இவ்வுணவு என்னுடலை வளப்படுத்துக

உடலின் நிறைகுறை சமப்படுத்துக

என்றுசொல்லி உண்ணப் பழகிடு

முன்னம் உணவே உடலாகிற்றே

அதனால் அதுவே சரிப்படுத்தும்

மருந்தொன்று வேண்டாம் உடலுக்கு

உணவுஅது போற்றி உண்டாலெனும்

வள்ளுவன் சொன்னது புரியவரும்!

உணவின் மகிமை தெரியவரும்!

விளக்கம்:

ஓவ்வொரு மனிதரும் தற்காலத்தில், உணவு குறைவாக எடுத்துக்கொண்டு, அடுத்த உணவாக நிறைய மாத்திரைகளை உட்கொள்ளும் காலம் இது. ஆம், அப்படி வரிசையாக பலப்பல நோய்கள். அதை கட்டுப்படுத்தவும், தடுத்து நிறுத்தவும் அத்தகைய மருந்துகள் தேவைப்படுகின்றன.

இவர்களின் முந்தைய நாட்களை ஆராய்ந்தால், தன் விருப்பத்தின் பேரில், கண்ட கண்ட உணவு வகைகளை அளவு மீறி, நேரம் தவறி சாப்பிட்டதாலேயே தான் என்ற காரணம் விளங்கும். மேலும், உணவு உண்ட உடனே தேவைக்கு மீறி உழைப்பது, அல்லது வெறுமனே சோம்பேறியாக இருப்பதும் காரணமாகிறது. கூடுதலாக உணவு செரிக்குமுன்பே மறுபடி நொறுக்கு தீனியாக சாப்பிட்டதும் இத்தகைய நோய்களை கொண்டுவந்துவிட்டது.

சத்தான உணவு, தன் உடலுக்கு பொருத்தமான உணவு, நேரம் தவறாத உணவு என்ற நிலையை இவர்கள் கடைபிடிக்கவில்லை என்பதும் தெரியவரும்.

இந்த நிலைமாறி உணவே மருந்தாகும் வழி என்ன என்பதை, இந்தக்கவிதை நமக்கு விளக்குகிறது.

வாழ்க வளமுடன்.

-------

Thanks to photos: Google search, Copyright to it's owners