Change will come from itself

தன்னிலிருந்து மாற்றம்!

உலகை திருத்திட எண்ணுவோர் பலர்

தன்னை திருத்திட தயங்குவார் பாரீர்

உலகம் என்பதே தன்னுடைய கூறே!

தானே உலகின் பிரதிபலிப்பு அறிவீர்.

மாற்றம் தன்னிடம் வளர்ந்தால் உண்டு

தொடரும் எங்கும் உலகமெங்கும் கண்டு.

தாமதம் ஆனால் மாற்றஎளிதோ துன்பம்

தயக்கம் ஏனோ இன்றேதுணிந்திட இன்பம்!

விளக்கம்:

ஒவ்வொரு தனித்தனி மரமும் சேர்ந்ததுதான் காடு. ஒவ்வொரு தனித்தனி செடிகளும் இணைந்ததுதான் பூங்கா. அதுபோலவே ஒவ்வொரு தனித்தனி மனிதனும் சேர்ந்ததுதான் இந்த உலகம். தன்னை திருத்திக் கொள்ளாது, இந்த உலகை திருத்த முயலுபவர்கள் நிறைய நபர்கள் இருக்கிறார்கள். தான் ஒரு வழிகாட்டியாக இருக்கவேண்டும் என்று முடிவு செய்து, தன்னை திருத்தி வாழ முற்பட்டால்தான், இவரைக்கண்டு இந்த உலகில் வாழும் ஒவ்வொருவரும் மாற்றம் பெற முயற்சிப்பார்கள். அவ்வகையில்தான் உலகம் முழுதும் மாற்றம் நிகழும்.

தன்னை திருத்தாது, உலகை திருத்த நினைத்தால் அதில் தோல்வியே கிடைக்கும். ஆனால் இதற்கு ஆர்வமின்றி, தாமதம் செய்து தானும் துன்பத்தில் சிக்கி, உலக வாழ்வில் கஷ்டப்படுவார்கள். இதற்கு அவர்கள் சொல்லும் சப்பைக்கட்டு “அவர் திருந்தாமல் நான் மட்டும் திருந்த வேண்டுமோ?”

திருத்தம் பெற வேண்டும் என்ற உண்மை உங்களுக்கு தெரிந்திருக்கிறது. அவருக்கு தெரியவில்லை. அவர் பின்நாளில் வருவார். நீங்கள் தாமதிக்காது, தயக்கமின்றி இன்றே துணிந்து மாற்றங்களைப் பெற்றால், உங்கள் வாழ்வு இனிதாகும் என்று இந்தக்கவி விளக்குகிறது.

வாழ்க வளமுடன். 

-----

Thanks to Image by: Pexels and @Andrea Piacquadio