The sweetness of the not moved swing!

ஆடாத ஊஞ்சலின் இனிமை!

ஏதும் இல்லையோ சொல்லுதற்கு

யோகம் தவிரவே, எப்போதும்?

என்று கேட்டால் பதிலுண்டு

யோகம் ஒன்றே முழுமைநிலை

மற்றெல்லாம் மனம் எழுச்சிநிலை

ஊஞ்சல் ஆடியாடி களைத்தால்

தள்ளாடி தடுமாறி விழுவீரே!?

நிலைத்து நிற்க யோகத்தில்

வழியுண்டு மேலும் மனமூலமறியும்.

ஊஞ்சல் இல்லாமல் நிறைவுண்டு!

விளக்கம்:

எனக்கே சலித்துவிட்டது ஐயா, எப்போது கவி எழுதினாலும் யோகம்தானா? வேறென்று இல்லையா? என்று கேட்ட அன்பருக்கு பதிலாக, இக்கவி எழுகிறது. யோகமே மனித வாழ்வின் முழுமை நெறி. ஆனால் யாரோ சில மனிதர்களால், தவறாக அர்த்தம் சொல்லப்பட்டு, எந்த மனிதருக்கும் தேவையே இல்லை என்ற அளவிற்கு பிரிந்து நிற்கிறது. அந்த சில மனிதர்களுக்கு இதில் நிறைய லாபம் உண்டாகி இருக்கிறது எனவே அது இன்னமும் தொடர்கிறது. மனிதனும் பிறந்துகொண்டே இருக்கிறான், இறந்துகொண்டே இருக்கிறான். வீடுபேறு அடைவதற்கு வழியே இல்லாமல்!

உங்களுக்கு ஊஞ்சலாட்டம் பிடிக்கும், ஆனால் ஆடிக்கொண்டே இருந்தால் என்ன ஆகும்?! தலை கிறுகிறுத்து நிற்க வழி இல்லாமல் தடுமாறி கீழே விழுவீர்கள். இந்த ஊஞ்சலாட்டாம் மனதால் ஏற்படுகிறது என்பதாக வைத்துக்கொண்டால், உங்கள் வாழ்க்கை நோக்கம் திசை மாறிடும்தானே?

ஆனால் யோகம் கற்று அகத்தவத்தில் ஆழ்ந்தால், ஊஞ்சலாடும் மனதை நிலை நிறுத்தி, தன் மூலம் அறிந்து, வாழ்வின் நோக்கம் அறிந்து, நிறைந்த மகிழ்வில் நிலைத்து நிற்கலாமே?! மகிழ்விற்காக ஊஞ்சலாடி தடுமாற வேண்டாமே என்று இக்கவி விளக்குகிறது. 

-----

Thanks to Image by: Depositphotos.com