Almighty being as a consciousness

அறிவே தெய்வமாம்!

அகத்தவம் செய்தால் போதாது,

அத்தவத்தில் மூழ்கி திளைப்பாய்.

ஆராய்ச்சி செய்வாய் உள்நிகழ்வை.

அரக்கபரக்க தவமென்றும் உதவாது.

ஆரவாரம் இன்றிஉன் நிலைஎதுஅறி!

அருகருகே நிகழ்வது மனம்விலக்கி

ஐம்புலன் உணர்வுகள் தவிர்த்திடு.

அழுத்தமாய் மனதால் விளங்கிடு.

ஆர்பரிக்கும் உயிரில் நிலைத்திரு

அதன்மைய அறிவே தெய்வமாம்!

விளக்கம்:

அஞ்சுவதேன், துணிந்து உரைப்போம் “அறிவேதான் தெய்வம்” என்று முழங்கியவர், குரு மகான் வேதாத்திரி மகரிசி அவர்கள். முந்தைய சித்தர்கள், ஞானிகள் விளக்கியிருந்த நிலையில், அதை இன்னும் விளக்கமாக தந்தவர் வேதாத்திரியே! 

தினமும் தவம் செய்வது மட்டும் போதாது. அத்தவத்திம் மூழ்கி திளைக்க வேண்டும்.  என்ன நடக்கிறது என்பதை சிந்திக்கவேண்டும். ஆகா, நேரமாகிவிட்டது, உடனே தவம் செய்ய வேண்டும் என்று பரபரப்பாக தவம் செய்வது பலன் தராது. நல்ல அமைதியான மன நிலை, தகுந்த இடம், நேரம், மிதமான வெளிச்சமும் முக்கியம். இரைச்சல் மிகுந்த இடத்தில் தவம் அமையாது.

அகத்தவத்தில், நம்மை சுற்றி நடப்பதை விலக்கி, மனம் அதில் ஈடுபடாமல், ஐம்புலன்களில் அழுத்தத்தை மட்டும் உணர்வாக கண்டு ஆக்கினை தவம் செய்யவேண்டும். ஆக்கினைக்கு பிறகு, துரிய தவத்தில் மனதை உயிரில் நிலைக்கச் செய்து தவம் இயற்றுகிறோம். நீண்ட அனுபவத்திற்குப்பிறகு அந்த உயிரின் மையமாக உள்ள அறிவுதான் “தெய்வம்” என்பதை நாம் உணர்ந்து தெளியலாம்.

இவ்வாறாக இக்கவிதை விளக்கம் அளிக்கிறது.

வாழ்க வளமுடன். 

-----