Let's not forget our duty!

கடமை மறவாது இருப்போம்!

துறந்தே வாழ்தல் மனிதருக்கொவ்வா!

இருப்பதை பகிர்தல் மனிதர்தகமை!

சிறுவோர் பெரியோர் நலம்காத்தல்

இளையோர் கடமை தவிர்க்கலாகா!

சிறுவோர்க் கடமை நல்வழிவளர்தல்

பெரியோர்க் கடமை நல்வழிப்படுத்துதல்

எல்லோரும் கடமை நிறைவேற்றிட

இல்லாரும் இல்லாத நிலைமாறிடும்!

யாரொருவர் திசைமாறி பயணித்தால்

திருந்திடவே திருத்தம் தந்துமகிழ்வோம்!

விளக்கம்:

எல்லாம் துறந்து இந்த உலகில் வாழ முடியாது. ஆனாலும் இருப்பதைக்கொண்டு நாம் இன்பமாக இருக்கிறோமா என்றால் அதுவும் இல்லை. இன்னும் வேண்டும் என்றே தேவைகள் பெருகிக் கொண்டே உள்ளன. ஆனால் எது வேண்டுமோ அதோடு நின்றால் இன்பம் உண்டு. எனவே, உலகில் வாழ்வோர் துறந்து வாழ்தல் யாருக்குமே பொருத்தமற்றது. இருப்பவர் தன்னிடமிகுந்து இருப்பதை மட்டும், இல்லாதவருக்கு பகிர்ந்து கொண்டால் நல்லது. அந்த தன்மை மலர வேண்டும்.

குழந்தைகள், சிறுவர், சிறுமியர் ஆகியோர்க்கு, நல்வழி கற்று ஆளாக்குதல் பெரியோரின் கடமையாகும். பெரியோர் தானும் வாழ்ந்து, இளையோரை வளர்த்தெடுப்பதால், முதியோர் ஆகும் காலத்தில் அவர்கள் நலம் காப்பது, இளையோரின் கடமையாக கொள்ள வேண்டும்.

எல்லோரும், ஒருவருக்கொருவர் நலன் கருதி, கடமைகளை நிறைவேற்றினால், குடும்பமும், சமூகமும், ஊரும், உலகமும் சிறப்படையும்.

இந்த வரிசையில், வழி தெரியாமல் திசை மாறி கடமை தவறினால், அவர்களை முறையோடு, அறிவுரைகூறி, திருத்தி வாழச் செய்யவேண்டும். தண்டனை தருவதாக இருந்தால், அது அவருக்கு நன்மை தருவதாகவே இருக்கவேண்டும். இவ்வாறாக இக்கவிதை விளக்கம் அளிக்கிறது. 

வாழ்க வளமுடன்

-----

Present by:

Thanks to Image by: internet source