Return the way you came!

வந்த வழியே திரும்புதல்!

வீட்டிலே இருந்துதான் வந்தாய்.

பயணத்தில் வந்து சேர்ந்தாய்,

கொண்டு வந்தவினை மறந்தாய்.

தீர்ப்பதற்கு வழியின்றி சேர்த்தாய்,

பயணத்தின் நோக்கம் இழந்தாய்!

ஞானியர் சொன்னசொல் இகழ்ந்தாய்!

தனிமனித திருத்தம் துறந்தாய்,

எல்லாச் சுகமும்தேடி அலைந்தாய்!

வீட்டிற்கே திரும்பவும் போவாய்,

உண்மை மறந்தே அழுதாய்!

விளக்கம்:

உருவமில்லாத நிலையில் இருந்து, கருவாகி, தாயின் கர்பப்பையில் தங்கி, வளர்ந்து, உலகில் பிறக்கிறோம். எனவே ஏதோ ஒரு வீட்டில் இருந்து வந்தோம் என்பது தெளிவாகிறது. அதுபோலவே இறந்துபோனால், அதுவும் ஒரு வீடடைவதாக அர்த்தம் கொள்ளலாம். இதைத்தான் வீடுபேறு என்று தமிழ் ஞானியர்கள் சொன்னார்கள். மேலும்

தீர்க்க முடியாமல், மிச்சம் வைத்த வினைகள் இயற்கையாகவே ஒவ்வொரு பிறவியிலும் சேர்ந்துகொண்டே வருகின்றன. 

இவைகளை தீர்க்க இந்த பிறவியை பயன்படுத்தமுடியும். ஆனால் வந்து பிறந்த உலகில் எல்லாம் மறந்து, நோக்கமும் தவறி, ஞானியர்க சொன்னதை கவனமற்று வாழ்கிறோம். தன்னையும் திருத்திக் கொள்ள ஆர்வமில்லை. பணம், பொருள், சுகம் என்றே வாழ்க்கை ஓடுகிறது. வாழ்வின் இறுதியில், “ஐயோ, இறக்கப்போகிறேனே” என்று கவலை கொள்கிறோம். 

வாழும் பொழுதே, நாம் எங்கிருந்து வந்தோம், எங்கே போகப்போகிறோம், நான் யார் என்றெல்லாம் கேள்விகள் எழுப்பி ஆராய்ச்சி செய்திருந்தால், இந்த கவலை நேருமா? என்று இந்தக்கவிதை விளக்கமளிக்கிறது.

வாழ்க வளமுடன்.

-----

Thanks to Image by: 123rf.com