The God is Everywhere!

இறைந்து கிடப்பது!

இறையென்றால் இறைந்து கிடப்பது!

கண்ணுக்குப் புலனாகா தன்மையது!

கலந்திருக்கும் எங்கிலும் ஊடாகவே!

கருத்திற்கும் தடுத்து நிற்காதது,

சிந்தனைக்கும் வலிந்து நிற்காதது

புலனைந்தும் கடந்து ஓடிவிடுமது!

மனமன்றிஅகத் தவத்தால் ஒடுங்க

தன்னிலைகாட்டி தடுத்து ஆட்கொள்ளும்,

தன்மையது முழுதுணர உன்மூலம்!

கடந்துள்ளே அறிவதைத்தவிர வேறில்லை!

விளக்கம்:

இறை என்றால் இரண்டு அர்த்தங்களை பெறலாம். 1) இறை (இறைவன், இறைவி என்ற பால் பாகுபாடு இல்லை) 2) இறைந்து கிடப்பது.

அது எப்படிப்பட்டது? கண்ணுக்கு புலனாகாது அவ்வளவு நுண்ணியது. அண்டத்திலும், பிண்டத்திலும், எங்கும் இருக்கும். கருத்தில் சொல்லி புரியவைக்க இயலாது. சிந்தித்தால், சிந்தனைக்கும் சிக்காது. ஐந்து புலன்களால் அறியவே முடியாது.

இருக்கும் ஒரே வழி அகத்தவம். அத்தவத்தில் மனம் ஒடுங்கி நின்றால், இறை என்பதை உணரலாம். ஆழ்ந்து செல்லச்செல்ல அதுவே மூலம் என்பதையும் உணரலாம். எனவே கடவுளை அறிய கடந்து உள்ளே செல்வதத்தவிர வேறு வழி இல்லை என்று இக்கவி விளக்குகிறது. 

-----