True grace!

உண்மை அருள்!

பொருள் தேடும் காலத்தில்

அருள் தேடுதல் சுலபமே!

அருள் தேடிப் பொருளை

இழக்க வழியேதும் இல்லை!

பெறுவீர் எல்லா வளமும்!

ஆனால் அருள் பெறவே

பொருளை தந்து இழக்கிறீர்

உடலை வருத்தி மகிழ்கிறீர்

மலை உச்சி ஏறிவருந்துறீர்

உண்மை அருளெது உணர்வீர்!

விளக்கம்:

இந்த உலகில் வாழும் மனிதர்களுக்கு மட்டுமே “பணம்” தேவைப்படுகிறது. வேறு எந்த உயிரினங்களுக்கும் பணம் தேவை இல்லை. அதைத் தேடி அலையவேண்டியதும் இல்லை. பணம் கொடுத்து எதையும் பெற வேண்டியதும் இல்லை. ஆனால் மனிதன் பிறப்பதற்கே பணத்தை அழுகவேண்டியதாக (?!) இருக்கிறது. இது எந்த வகையான சாபக்கேடு?!

இந்த சுழலில் பொருள் தேடமட்டுமே வாழ்க்கை வீணாகிறது. அருள் தேட யாருக்கும் ஆர்வமில்லை. அருள் தேடினால் பொருள் அழிந்துவிடும் என்று பயப்படுகிறார்கள். ஆனால் இவர்கள்தான் என்பங்கு என்று, தான் வணங்கும் தெய்வத்திடம் (?!) பங்கு கொடுக்கிறார்கள். இல்லையேல் தெய்வத்தின் தூதரிடம் கொடுத்து விடுகிறார்கள். உடலை வருத்தி நடைப்பயணம் செய்கிறார்கள். மலை உச்சி ஏறி இறங்குகிறார்கள். 

ஆனால், அருளைப்பெறுதல் மிக எளிதானது என்று இக்கவி விளக்குகிறது.

வாழ்க வளமுடன்.

-----

Thanks to Image by: 123rf.com