God's Embrace

 இறையின் அணைப்பு!

இறப்புக்கும் பிறப்புக்கும் இடையே

இருக்கும் வாழ்நாட்களை தீர்ப்பதே

மனிதவாழ்வு எனினும் வகைவேறே.

ஏற்கனவே வாழ்ந்தோரின் பதிவேற்று

மிச்சம்மீதி சிறந்தோ கழித்தோவரும்.

இன்றைய வாழ்வுசிறப்பு என்றாலும்

இன்றைய வாழ்வுஇழப்பு என்றாலும்

துணையாக தெய்வம் இருக்கக்காண்.

இன்பத்தின் மிகையே துன்பமென்பதறி.

இரண்டுக்கும் நடுவாய் அமைதிகொள்!

மிகைஏழை இருமனிதருக்கும் பொதுவாய்,

இறையின் விரிந்த அன்பும்கருணையும்!

விளக்கம்:

உலகவாழ்வில் மனிதர்களின் வாழ்க்கை சிந்தனைக்குறியதே ஆகும். பிறப்பு, இறப்பு என்ற நிலையில் ஒன்றாக இருந்தாலும், வாழும் வாழ்நாட்களில் எத்தனையோ வேறுபாடுகள் நிரம்பியிருக்கிறதே! சுகம் துக்கம், இன்பம் துன்பம், ஏழை மிகை என்றவாறு எத்தனை வாழ்கை முறைகளில் மனிதர்கள் சிக்கித்தவிக்கின்றனர் என்பதை காண்கிறோம். நாமும் அவர்களில் ஒருவர்தானே!

ஆனால் எப்படியோ வாழ்வு ஓடிக்கொண்டிருக்கிறது. மனிதன் பிறப்பு, ஏற்கனவே பிறந்த தாய், தந்தை இருவரின் கலப்பினால் வரும் தொடர்தானே? அவர்களின் மிச்சம்மீதி நம்மோடு இருக்கிறதே? அதில் இருக்கும் நிறை, குறை நம் வாழ்வை நிர்ணயிக்கிறது. அதில்தான் வேறுபாடுகள் வந்துவிடுகின்றன.

எனினும், இந்த வாழ்வு சிறப்பா? இழப்பா? எப்படியாயினும், துணையாக இறை இருக்கிறது. அதனால்தான் நாம் இறக்காமலிருக்கிறோம். 

மேலும் துன்பம் என்பது என்ன? இன்பத்தின் அளவு முறை மீறிட அதன் பொருத்தமில்லா உணர்ச்சிதான் துன்பம் என்று குரு மகான் வேதாத்திரி மகரிசி குறுப்பிடுகிறார். அதை உணர்ந்து இருக்கும் நிலையிலே “அமைதியோடு” வாழ முயற்சிக்க வேண்டும்.

ஏழையாயினும், மிகையாயினும் இருவருக்கும் இறை பேதம் பார்ப்பதில்லை, அன்பும் கருணையிலும் குறையில்லை என்பதை உணர்ந்து தெளியவேண்டும் என்று இந்தக்கவிதை வாழ்வியல் உண்மை விளக்குகிறது.

வாழ்க வளமுடன்.

-----

Present by: