Knowing what exists!

 இருப்பதை அறிந்தால்!

தன்னுள்ளும் இருப்பதறியா நிலையில்

தன்னைத் தாண்டிவெளியே வணங்குதல்

தன்னையே அறியும்வழி அதுபக்தியாம்

தனக்குள் இருப்பதை தேடிபெறுவதற்கு

தவம்வழி முயற்சிப்பது யோகமாம்

தன்னுள்ளே இருப்பதறிதல் முக்தியாம்

தன்னையும் இருப்பதையும் அறிந்தே

தானாகிஉலகில் அன்புபகிர்தல் ஞானமாம்!

விளக்கம்:

“அறிவே தெய்வம்” என்ற தாயுமானவர் சொல்லிச் சென்றதை, வகைப்படுத்தி, அறியத்தந்தவர், குரு மகான் வேதாத்திரி மகரிசி அவர்கள். அத்தகைய தெய்வ நிலை தனக்குள் இருப்பதை அறிந்து உணரவே, மனிதப்பிறப்பு மலர்ந்தது. தன்னை தேடுதலின் பயனாக விளைந்த, முழுமை வடிவமே மனிதன். இதில் நிறைவு பெறாமல் மனிதவாழ்வு நிறைவடைவதில்லை. பிறப்பு, இறப்பு, மீண்டும் பிறப்பு என்று நீண்டுகொண்டே வருகிறது.

அறிவே தெய்வமான அந்நிலைகளை, வேதாத்திரி மகரிசி அவர்கள் இப்படிச் சொல்லுகிறார். உலகில், தெய்வம் என்ற அறிவு நிலை அறியாது, அந்த அறிவுக்கே அடிமையாதல் “பக்தி” என்றும், அவ்வறிவு தன்னை அறிய எட்டுத்துக்கொள்ளும் முயற்சி “யோகம்” என்றும், அறிவு தன்னை யார் என்று அறிந்த நிலைக்கு “முக்தி” என்றும், அறிவை அறிந்த முழுமைத்தெளிவில், வாழும் உலகில் மக்களுக்கு அன்பை பகிரும் நிலை “ஞானம்” என்றும் வகைப்படுத்துகிறார்.

இந்தக் கவிதையும், பக்தி, யோகம், முக்தி, ஞானம் என்ற நிலைகளை புரிந்துகொள்ள விளக்கம் அளிக்கிறது.

வாழ்க வளமுடன். 

-----

Present by: