Let us get a Gift!

பரிசை பெறுவோம்!

கடந்து தானுள்ளே பெற்றபரிசு

பகிரவே ஆர்வம் கொண்டார்

ஞானியர் பல்லோர் இந்நாளிலும்.

தனக்கெ என்றுஏதும் இல்லாமல்!

ஆர்வம் இல்லைநாம் பெறுவதற்கே!

பரிசுஏதும் இல்லாமல் நாம்சுகமே

என்றே நினைத்து ஒதுங்குகிறோம்!

பரிசுஏது எனினும் என்னிடமிருந்தும்

பறிப்பார் என்றே கட்டுக்கதைஏற்றோம்!

பணம்பறித்தே தன்வயிறு வளர்க்கும்

இடைதரகர் கடவுளுக்கே நின்றமனிதரால்.

இனியாவது உண்மை தெளிந்தேற்போம்!

விளக்கம்:

இறைவனுக்கும் நமக்கும் குறுக்கே ஒருவர் தேவையில்லை என்பதை நம் அறியாதிருக்கிறோம். இறை இறைந்து கிடப்பதை அறியாமல், எங்கோ ஒரிடத்தில்தான் இருக்கிறது. அதற்கு அப்படி, இப்படி செய்யவேண்டும், அப்போதுதான் பலன் கிடைக்கும் என்று நம்மிடம் பணம், செல்வம் பறிக்கும் இடைத்தரகர் கட்டுக்கதைகளை நம்பிவிட்டோம். ஒரு ஞானி நம்மிடமிருந்து எல்லாம் பறித்துக்கொள்வார் என்றும் சொல்லிவிட்டார். ஒரு ஞானிக்கு தேவை என்ன இருக்கிறது? என்று நாம் சிந்திப்பதில்லை.

ஒரு ஞானி, தான் பல்லாண்டுகால சிந்தனையில், தன்னை வருத்தி, இறை உணர்ந்த உண்மையை, அந்த ரகசியத்தை, தானே வைத்துக் கொள்ளாமல்,  மிக எளிதாக நமக்கு தந்தால் அதை நாம் ஏற்றுக்கொள்வதில்லை.

இப்போதும் வேண்டாம், எப்போதும் வேண்டாம் என்று ஒதுக்கி விடுகிறோம். இறை ஞானம் தரும் ஞானியை நாம் புரிந்துகொள்ள முயற்சிக்க வேண்டும், அதே நேரம், போலியான ஞானிகளை அடையாளம் கண்டுகொள்ளவும் வேண்டும் என்று இக்கவி உண்மை தருகிறது.

வாழ்க வளமுடன்.