What is the truth of life?

 வாழ்நாள் உண்மை எது? 

ஒருநாள் வாழும் ஈசல்போல்

மனிதர் நமது வாழ்நாளில்லை

இத்தனை வாழ்நாள் இருந்தும்கூட

உண்மை அறியவே நினைக்கவில்லை

ஏனோ பிறந்தோம் வளர்ந்தோம்

என்றே வாழ்ந்து செத்துமடிகிறோம்!

உண்மை மூலம் காரணமறிந்து

பிறப்பின் நோக்கம் அறிந்திட்டால்

ஏதுஇறை என்றே உணர்ந்திடலாம்

வாழ்வில் இன்பம் திளைத்திடலாம்!

விளக்கம்:

மழைக் காலங்களில், தீடீரென்று மண்ணுக்குள் இருந்து ஈசல் பறக்கத் துவங்கும். அந்த ஒரே நாளில் பெரும்பாலனவை இறந்துவிடும். பிறப்பும் இறப்பும் ஒருநாள் என்றே கருதவேண்டியுள்ளது. ஆனால் மனிதர்களாகிய நமக்கு சராசரியாக 60 ஆண்டுகள் முழுதாக கிடைக்கிறது. சில இறப்புக்கள் தவிர்க்க முடியாதவை. ஒருசிலர் கிட்டதட்ட 100 ஆண்டுகள் வாழ்வதையும் காண்கிறோம்.

இத்தனை ஆண்டு வாழ்நாள் கிடைத்தும், ஏன் பிறந்தோம்? எதற்காக? ஏன் வாழ்கிறோம்? ஏன் சாகிறோம்? கடவுள் யார்? நான் யார்? என்று கேள்விகள் தனக்குள்ளே கேட்டு சிந்திக்கிறோமா? ஏதோ பேசதெரிந்த, சிந்திக்கதெரிந்த, விலங்குகளுக்கு மேலான ஒரு பிறவி மனிதன் என்பது போலவேதான் வாழ்ந்து மடிகிறோம்.

தத்துவ மூலமாகவும், பக்தி மூலமாகவும், யோகம் மூலமாகவும் “நான் யார்?” என்று சிந்தித்தால், நம் வாழ்நாளுக்குள் இறை என்பது என்ன? என்பதில் தொடங்கி, எல்லா கேள்விகளுக்கும் பதில் கிடைத்திடும். அந்த உண்மை அறிந்திட்டால், இனி வரும் வாழ்வை எத்தகைய முறையில், இன்பமாக வாழ முடியும் என்பதற்கான விளக்கம் கிடைத்துவிடும் என்பதாக, இந்தக்கவிதை நமக்கு விளக்கம் அளிக்கிறது.

வாழ்க வளமுடன்.

-----

Present by: