Happy Dizziness!

 சந்தோச மயக்கம்! 

உணர்வின் ஐந்து நிலை தூண்டியே

தன்னிலை மறந்து செயல் படுவதற்கு

சுற்றிலும் பலநூறு ஆயிரம் மனிதர்கள்!

தன்னலம் நாடி பொருள் பறிப்பார்கூட

பொன்னான நேரம் அதனை சாய்ப்பார்!

உன்னைத் தொடாத மாய வித்தையது!

உலகியல் வாழ்வே இதுவெனும் பொய்யது!

மயக்கம் அதைச் சொல்ல புரிந்திடாது!

விளக்கில் மோதிடும் விட்டிற் பூச்சியாக

இயல்பே மறந்து வாழ்வு வீணாகுமே!

விளக்கம்:

சந்தோச மயக்கம் கேள்விப்பட்டிருப்பீர்கள். யாரேனும் ஒருவர் உங்களிடம், ஒரு மகிழ்ச்சியான செய்தியை சொல்லும் பொழுது, நம்பியும், நம்பாமலும் ஒரு திகைப்பு வரும், வானத்தில் மிதப்பது போல ஓர் உணர்வு உண்டாகும், அதுவே சந்தோச மயக்கம்.

இந்த உலகில் ஒவ்வொரு மனிதரும், ஆணும், பெண்ணும், இணை பாலினரும், குழந்தைகளும் இந்த சந்தோச மயக்கத்தில் திளைக்கிறோம். ஒரு தரம் மட்டுமல்ல, பலப்பல முறை. எப்படி? நம்மை சுற்றி நடக்கும் நிகழ்வுகளை கவனியுங்கள். முக்கியமாக பொழுதுப் போக்கு, செய்தி ஊடகங்கள், தொ(ல்)லைக்காட்சி, கணிணி வழி இணைய பயன்பாடு, கைபேசிவழி வழி இணைய பயன்பாடு, சினிமா, நாடகங்கள், கூத்து, பண்பலை வானொலி இப்படி பல வகைகளில், உங்கள் உணர்ச்சிகளைத் தூண்டி, தங்களுக்கு சாதகான வாய்ப்புக்களை உருவாக்குவார்கள். உங்களிடமிருந்து நன் மதிப்பை பெற்று ஏதேனும் வாங்கும்படி தூண்டுவார்கள்.

அதுகூட இந்த பொருள் முதல்வாத உலகில் ஏற்றுக் கொள்ளக் கூடியதே! ஆனால் உங்களின் பொன்னான நேரம் வீணாகிறதே?! உங்களை நேரடியாக தொடாமலேயே உங்களை சாய்த்துவிடுவார்கள். இது பொய் என்று உங்களுக்குத் தெரியும் ஆனால் மயக்க நிலையில், வேறு யார் சொல்லுவதையும் கேட்கமாட்டீர்கள்.

விட்டிற்பூச்சிகள், இரவு நேரங்களில் வீட்டிற்குள் வந்துவிட்டால், பிரகாசமாக எரியும் விளக்குகளை நோக்கி பறந்து, அந்த தீபத்தோடு மோதிக் கொண்டிருக்கும். அதுபோல இயல்பான வாழ்க்கை மறந்து, நாம் வாழ்நாளை வீணாக்கலாமா? என்று இந்தக்கவிதை விளக்கம் அளிக்கிறது.

வாழ்க வளமுடன்.

-----

Present by: