Not alone!

 தனித் தனி அல்ல!

இனிப்புப் பொருள் எது ஆனாலும்

எல்லாம் ஒன்றே அதன் சுவையால்!

உப்புக் கலந்த பொருள் எதுவோ

அவையெல்லாம் தரும் சுவை ஒன்றே!

மூலம் ஒன்றாம் எந்த உயிருக்கும்

மனிதனில் தனையே அறியும் அறிவு!

எண்ணம் ஒன்றாம் எவருக்கும், அதை

நலமே எண்ணி செயல்பட பெருவளமே!

விளக்கம்:

விழாக்காலங்களில், பலவிதமான இனிப்புப் பொருட்கள் வீட்டிலும் செய்வார்கள், விற்பனை கடைகளிலும் வாங்கிக் கொள்ளலாம். கேக், பூந்தி, லட்டு, ஜிலேபி, அல்வா, கேசரி, ஜாமூன், பாதுஷா, பால்கோவா இப்படியாக என்ன பெயரில் அழைத்தாலும், அவற்றின் தன்மை இனிப்பு என்ற நிலையில், மூலத்தில் ஒன்றாகி விடுகிறது.

இதுபோலவே உணவுவாக சமைக்கும் ஒவ்வொரு பொருளிலும், உப்பு சேர்க்கிறோம். அளவில் கூடுதல் குறைவு என்றாலும், உப்பில்லாமல் சமைப்பது இல்லை. எனவே உப்பு என்ற மூல சுவைக்குள் எல்லா உணவுகளும் ஒன்றாகி விடுகிறது.

இந்த பிரபஞ்சம் முழுதும் உள்ள பொருட்களுக்கும், பூமியில் உள்ள எல்லா உயிரினங்களுக்கும் மூலம் ஒன்றே. அவற்றின் வெளிப்பாடு அணுக்கள் கூட்டமாக அமைந்திருக்கிறதை நாம் காண்கிறோம். அந்த உயிரினங்களில் உன்னத பரிணாமமாகவே மனிதன் வந்தான். தன்னையும், மூலத்தையும் அறியும் அறிவும் கொண்டான்.

உலகில் எங்கே வாழும் மனிதர் என்றாலும், எண்ணம் என்பது ஒன்றே ஆகும், அது மூலத்தின் வெளிப்பாடக ஒன்றாக அமைந்திருக்கிறது. அந்த உண்மையை அறிந்து உயர்ந்த நோக்கில் எண்ணத்தைக் கொண்டு செயல்பட்டால், உலகம் முழுமைக்கும் வளம் உண்டாகும் என்ற உயர்ந்த உண்மையை இந்தக்கவிதை நமக்கு விளக்குகிறது. 

வாழ்க வளமுடன். 

-----

Present by: