Get amended alone!

தனியாக திருத்தம் பெறுக!

யாருக்கும் எக்குறையும் இல்லை என்றே

பொதுவான கருத்து எங்கும் நிறைக்கும்!

யாருக்கில்லை குறை என்றே எதிர்குரல்

எல்லோர் மனதிலும் ஒலிக்க காணலாம்!

குறைதீர்க்க முனைந்தால் எங்கனம் ஆகும்?

ஒருநாளில் ஒரேநாளில் தீர்க்க முடியுமோ?!

எங்கிருந்து எதைஎடுத்து சமன் செய்வதொ?!

சிந்தித்தே தனியாய் திருத்தம் பெறுவதேவழி!

விளக்கம்:

இந்த உலகில் மனிதர்வாழ்வு பலவித ஏற்றத்தாழ்வு கொண்டு நடந்துவருகிறது, ஏதுமில்லா ஏழை, எனக்கு நிறைவான வாழ்வு என்பான். எல்லாம் இருக்கும் பணக்காரன் நிறைவான வாழ்வு இல்லையே என்பான். நடுநிலையானவரோ, ஏதோ வாழ்க்கை ஓடுகிறது நானும் ஓடுகிறேன் என்பான். ஆனால் பொதுவான அரசியல் தலைவர்கள் கருத்து, யாருக்கும் எக்குறையும் இல்லை என்றே கருதி, அடுத்தடுத்த திட்டங்கள், நாட்டின் முன்றேற்றத்தில் அக்கறை கொண்டு செயல்படுத்துவார்கள்.

ஆனால் உங்களுக்கு என்ன குறை என்று யாரிடமாவது கேட்டுவிட்டால், “யாருக்குத்தான் குறை இல்லை, இருக்கு, நிறையா இருக்குங்க” என்று கூறி வருந்துவார்கள். ஆனால் இந்த குறைகளை, வேறு யாராவது ஒருவர் முன்நின்று தீர்க்க முடியுமா? ஒரு நாளில், ஒரே நாளில் எங்கள் குறை தீர வேண்டும் என்பதே பெரும்பாலோனோரின் எதிர்பார்ப்பாக இருக்கும். அப்படியெல்லாம் தீர்க்க முடியுமா? அதற்கான சக்தி நம்மிடமிருக்கிறதா?

ஆனாலும், எளிய வழி, ஒவ்வொருவரிடமும் இருக்கிறது. இதுவரை இருக்கின்ற பிரச்சனை, குறைகள் என்ன என்பதை தெளிவுபடுத்தி, தீர்க்க முடிந்தவற்றை வரிசைப்படுத்தி, தீர்க்க முடியாததை அனுபவத்தி ஏற்று அல்லது விலக்கி, இந்த குறையை, எதன் மூலமாக தீர்க்கலாம் என்று சிந்திக்கவேண்டும். அதன்படி தற்போதைய வாழ்க்கையை திருத்தி அமைக்கவேண்டும். தானே முன்னின்று இதை செயல்படுத்தினால் மட்டுமே வழி பிறக்கும் என்று இந்தக்கவிதை விளக்கம் தருகிறது.

வாழ்க வளமுடன்.

-----

Present by: