Happy New Year!

புத்தாண்டு மகிழ்ச்சி!

ஏற்புடைய புத்தாண்டு மகிழ்ச்சி பரவட்டும்

இனிதாக மக்கள்நலம் நிறைவே இருக்கட்டும்

கொடும் நோய்தொற்று அகன்று செல்லட்டும்

மனிதர்கள் மனதில் எல்லைகள் அகலட்டும்

நாடுமொழி மதஇன பிரிவகன்று ஒன்றட்டும்

ஓவ்வொரு மனிதரும் சகஉதரம் பேணட்டும்

உலகம் முழுமைகூடி சமாதானம் வசமாகட்டும்

பிறவிப்பயன் கடமை எதுவென்று கேள்விஎழட்டும்

இறையுணர்வு அறிந்து அறிவுமுழுமை பெறட்டும்

ஒழுக்கம்கடமை ஈகையாய் இனிதே வாழட்டும்!

விளக்கம்:

புத்தாண்டு 2022, உலகமக்கள் அனைவருமே, விதிவிலக்கின்றி, ஒரே நிலையில், மகிழ்ச்சியாக வரவேற்று கொண்டாடுகிறார்கள். அந்த மகிழ்ச்சி ஆண்டு முழுதும் பரவி, மக்கள் நலனே கொண்டதாக அமையட்டும் என்று நாம் விரும்புகிறோம். மேலும் கொடும் நோய்தொற்று அதன் வீரியம் இனியாவது குறையட்டும், நலம் பெற்று வாழ வேண்டும் என்று விரும்புவோம்.

மக்கள் மனதில் இருக்கக்கூடிய குண,நல வேறுபாடுகளும். உலகில் உள்ள நாடு, மொழி, மத, இன பிரிவுகளும் எல்லைகளும் அகலவேண்டும் என்றும் விரும்புவோம். சகோதரம் என்பது சக+உதரம் என்பதாகும். அதாவது ஒரே இரத்தம் கொண்டவர்கள்தாம் நாம் அனைவரும் என்ற கருத்து முன்னிறுத்துவோம். உலக நாடுகளின் தலைவர்கள், தத்தம் மக்களோடு கூடி சமாதானம் வசமாகவேண்டும் என்று விரும்புவோம். 

ஒரு மனித பிறப்பின் பயன், பிறவிக் கடன் என்பது என்ன? தன்னை யார் என்று அறிதலும், எது இறையாக இருக்கிறது என்ற உண்மை அறிதலும் ஆகும். அத்தகைய அறிதல் வசமாக விரும்புவோம். அந்த அறிதலில்தான் மனித அறிவு முழுமை பெறும். அந்த முழுமையில்தான், சித்தர்கள் வாழ்வில் கடைபிடித்த, ஒழுக்கம், கடமை, ஈகை இம்மூன்றையும், நாம் நம்முடைய வாழ்க்கையில் செயல்படுத்த இயலும். இனிதே வாழ முடியும் என்று இக்கவிதை விளக்கம் அளிக்கிறது.

வாழ்க வளமுடன்

-----

Present by: