The way to carve oneself

தன்னை செதுக்கிட வழி

தன்னையே தான் செதுக்கி வடிவமாக

மாற்றிக் கொள்ளும் பாறை ஏதுமில்லை

என்றாலும், காற்றில் மழையில் ஆற்றில்

எதிர்க்காத பாறையும் வடிவம் பெறும்

மனிதனுக்கு தனையே திருத்தி உயர்த்த

அவனேதான் பெற்ற ஆற்றவு உதவிடும்

அதற்கு வழியில்லை என்றாலும் ஞானியர்

வழிநடக்க உண்மை விளங்கி உயர்வார்!

விளக்கம்:

பூமியின் ஆழ்த்தில் இருந்து, கிளர்ந்து எழுந்து நின்றதுதான் மலைகள். மலைகள் தன் உறுதியை தவறவிட்டால், பாறைகளாக துண்டுகளாக மாறிவிடும். அப்பாறைகளுக்கு கரடுமுரடான உருவமே இருக்கும். தானாக எந்த வடிவமாகவும் மாற்றிக் கொள்ள முடியாது. ஆனால் கைதேர்ந்த சிற்பியிடம் கிடைத்தால், அவன் தன் உளியால், தேவையற்ற பகுதியை சிதைத்து, பாறைக்குள் ஒளிந்திருந்த வடிவத்தை வெளியே கொண்டுவருவான். ஆனால் சிற்பி இல்லாத நிலையில்?!

அந்த பாறை தன்னை வடிவமாக்க வழி இல்லாவிட்டாலும் கூட, காற்றின் உருட்டலுக்கும், மழைக்கும், ஆற்றின் வேகத்தில் எடுத்துச்செல்லப்பட்டும் ஏதேனும் ஒரு வடிவமாக மாறிவிடும். நேபாளம் நாட்டில் பாய்ந்தோடும் காளி-கண்டகி ஆற்றில், கிடைக்கும் சாளக்கிராம கற்கள் இறைத்தன்மை கொண்டதாக நம்புகிறார்கள். 

மனிதன், இயற்கையின் முழுமையான பிறவியாக, தன் வாழ்வில், தன் தவறுகளை திருத்தி, வாழ்க்கையை சீரமைத்துக் கொள்ளும்  ஆறாவது அறிவு நிலை பெற்றிருக்கிறான். தானே சிந்தித்து செயல்படவும் அவனுக்கு வழி உண்டு. அப்படியான திறமை சிலருக்கு இல்லாமல் இருக்கலாம் எனவே அதற்கு வழி இல்லாதவர்கள், சித்தர்கள், ஞானியர் தந்த வழியில் தன்னை மாற்றி அமைத்துக்கொண்டால், உண்மை விளங்கி உயர்வார்கள் என்ற உண்மையை, இந்தக்கவிதை நமக்கு அளிக்கிறது.

வாழ்க வளமுடன்.

-----

Present by: