There is no dawn for the soul!

ஆத்மாவுக்கு விடிவில்லை!

சாவியை முறுக்கி ஓடவைக்கும் பொம்மை

அல்லவே நீஉன்வாழ் கடமையை செய்வதற்கு

இயல்பாக இயங்கும் திறனது இருக்கையில்

எனோஅச் சாவியைத் தொலைத் தாற்போலவே!

உண்மை இலக்கு விலக்கி காற்றோடுபாயும்

பாய்மர கப்பலாக வாழ்கடலில் தத்தளிக்கிறாய்!

விளக்கம் பெறாத வாழ்வில் முடிவென்பதேது?

உன்வழியே வாரீசுபோக உனக்கும் விடிவெழாது!

விளக்கம்:

அறிவிற் சிறந்த பிறப்பாக, இயற்கையின் பரிமாணத்தில் முழுமைபெற்ற மனிதனாக வாழ்ந்து கொண்டிருக்கும் அற்புதம் அறியாதோர் யார்? இதை தனியாக சொல்ல வேண்டுமா என்ன? மனிதப் பிறப்பின் உன்மைத் தத்துவத்தை, சித்தர்கள், ஞானியர்கள், மகான்கள் தன் வாழ்வின் வழியாகவே நமக்கு தந்துள்ளார்கள். 

ஆனால் குழந்தைகள் விளையாட வைத்திருக்கும், சாவியை முறுக்கி ஓடவைக்கும் பொம்மைபோல, ஒவ்வொன்றாக மனிதனுக்கு இன்னமும் சொல்லிக் கொண்டிருப்பது வருத்தம் தருவதாகும். அப்படி அறிவுறுத்தினாலும் கூட, சாவியை தொலைத்து விட்டது போல, இதெல்லாம் என்னால் முடியாது என்று சொல்லி விடுவார்கள். இலக்கு நோக்கி பயணிக்கும் கப்பல்தான் சரியான கரையை அடையமுடியும். அதுவன்றி காற்றடிக்கும் திசையெல்லாம் நகரும் கப்பல் என்றுமே கரை சேராது. 

இயல்பான வாழ்வோடு, பொருளாதாரமும் இழக்காமல், அதன் துணையோடு இறை விளக்கம் பெற தகுந்த காலம் இது. “யோகத்திற்கு போனால், நீ வாழ முடியாது, இன்பம் துய்க்க முடியாது, எல்லாம் இழந்து விடுவாய்” என்று யாரோ பயமுறுத்திய வார்த்தைகளின் உண்மை அறியாது, துன்பக்கடலில் மனிதன் தத்தளிக்கிறான். அதனால்தான் யோகத்தால் ஒரு பலனும் இல்லை என்ற கருத்தோடு வாழ்ந்து மடிகிறான். அவன் வாரிசுகளும் அப்படியே வாழ்கின்றன. இதனால் அவனுடைய ஆத்மாவுக்கும் விடிவில்லை பிறருக்கும் விடிவில்லை என்ற உண்மை இந்தக்கவிதை விளக்குகிறது.

வாழ்க வளமுடன்.

-----

Present by: