The mind will get its attention

 மனம் தன்கவனம் பெற்றிடும்

தினம்தினம் தவம் பழகப் பழக

அலை பாயும் மனம் வேறுவழி

இன்றியே நிலை நின்று நிற்கும்

மனத்திடம் உறுதி உயர் எண்ணம்

வந்திடும் வெற்று ஆசை ஆர்வம்

கவனச் சிதறல் இவை கலைந்திடும்

பலகாலம் நிற்காத மனதின் ஓட்டம்

இக்கண முதல் தவத்தில் ஒடுங்கிடும்!

விளக்கம்:

உயர்ந்த குருவால் தீட்சை பெற்று, தவம் செய்யத் துவங்கி விட்டோம். இனி தினம் தினம், காலையும் மாலையும், 10 முதல் 15 நிமிடங்கள் தவம் செய்கிறோம். ஆரம்ப நாட்களில், கண்மூடி அமர்ந்திருந்தாலும் கூட, இந்த மனம் வழக்கம் போலவே ஏதேதோ நினைத்துக் கொண்டும், எடுத்து காட்டிக் கொண்டும் இருக்கும். “இதெல்லாம் உனக்கு தேவையா?” என்று கூட கேள்வி கேட்கும். ஆனாலும் நம்முடைய உறுதியை கண்டு, வேறு வழியில்லை என்று ஆட்டம் போட்டுக் கொண்டிருந்த மனம் கொஞ்சம் கொஞ்சமாக நிற்கத்துவங்கும்.

தொடர்ந்து இந்நிலை பழகிட, மனதின் திடம், உறுதி வரும், நல் எண்ணங்கள் உதயமாகும். வெற்று ஆசை, நிறைவேறாத ஆசைகள் தானாகவே வேண்டாம் என்று கலைந்துவிடும். எதில் உண்மையாக ஆர்வம் உள்ளதோ அது நிலைக்கும். இனி கவனச்சிதறல் இருக்காது. இது எல்லாமே ஆரம்ப கால தவத்தின் பயனாக கிடைக்கும் முன்னேற்றங்கள் ஆகும்.

இந்த மனதின் ஓட்டம், இத்தனை ஆண்டுக்காலமாக முறைப்படுத்தாமலேயே இயங்கிக் கொண்டிருந்தது. அதனால்தான் அது தன் நிலை பெற, தவம் செய்தும் கூட கொஞ்சம் எடுத்துக் கொண்டது. இப்போது, தன் நிலை எது என உணர ஆர்வம் கொண்டுவிட்டது. எனவே இனி தவத்தில் நல்ல முன்னேற்றத்தை தரும் என்பதாக இந்தக்கவிதை உண்மை விளக்கம் அளிக்கிறது.

வாழ்க வளமுடன்

-----

Present by: