Time to perform penance?!

 தவம் செய்ய தகுந்த நேரம்?!

அகத்தவம் செய்ய தகுந்த நேரமெது?

அதிகாலை கதிரவன் எழும் முன்னே

உலகம் விழித்தெழும் உள்ளம் மலரும்

மனம் பூரிக்கும் அலைச்சூழல் அதுவே!

தவறாது விடாமுயற்சி ஆர்வம் கூடிடவே

தினதினமும் படிப்படியாக ஏற்றம் காணும்

குறிப்பாய் ஓரிடம் ஓர்நேரம் வகுத்தே

மனமொன்றி பழகப்பழக தவம் இனிதே!

விளக்கம்:

உயர்ந்த குருவின் மூலமாக தவம் கற்றாகிவிட்டது. இனி அதை தொடர்ந்து செய்ய வேண்டும் என்றால் தகுந்த நேரம் என்ன? உலகம் விழித்தெழுவதற்கு முன்னால், இருள் வானம் வெளிச்சம் பரவி வரும் வேளை, சூரிய கதிர்கள் செவ்வானம் பூசுவதற்கு முன்பே, தவம் ஆரம்பித்திட நன்று. அந்த அதிகாலை அமைதி, இயற்கையின் மலர்ச்சி, பறவைகளின் இனிய கீச்சொலி கேட்டு மனம் பூரிக்கும், நல்ல அலைச்சூழல் எழும். உள்ளம் மகிழும்.

தினம்தோறும் தவறாது, விடாமுயற்சியோடும், ஆர்வத்தோடும் தவம் செய்ய வேண்டும் என்றே உறுதி கொள்ள வேண்டும். அப்போதுதான் தவம் நமக்கு நன்மையை உருவாக்கித் தரும். ஏதோ ஒருநாள் செய்தால் போதுமென்றோ, சலிப்போ, தள்ளிப்போடுதலோ கூடாது.

வீட்டில் தவம் செய்வதாக இருந்தால், எப்போதும் ஒரே இடம், சரியான நேரம் என்பதை தேர்வு செய்துகொள்ள வேண்டும். அப்போதுதான் இடர்பாடுகள் இன்றி இருக்கும். மனமும் அதற்கு தகுந்தபடி பழகிக்கொள்ளும், தவமும் இனிதாகும் என்று இந்தக்கவிதை தவம் இயற்றுவது குறித்த உண்மைகளை சொல்லுகிறது.

வாழ்க வளமுடன்

-----

Present by: