Introduction to Duriya Meditation

 துரியதவம் அறிமுகம்!

ஆக்ஞை மனம் ஓர்மை புலன்களில்

விழிப்புணர்வு தந்து செயல் திருத்தம்

தந்தே வாழ்வில் உயர்த்த தவஆற்றல்

மீறிட துணை செய்திடும் சாந்திதவம்

இதற்கடுத்து இறை வாசல் தவமாம்

தவத்தில் உயர்ந்த தவம் துரியமாகும்

மனதை புலன்கடந்து மனதால் அறிந்த

ஒருவர்க்கு தன்னுயிர் உணர வழியாம்! 

விளக்கம்:

குருவின் துணை கொண்டு, ஆக்கினை தவம் கற்று, ஆழ்ந்து செல்லச்செல்ல, அதனால் ஏற்பட்ட தவ ஆற்றலை சரி செய்துகொள்வதற்காக சாந்தி தவமும் கற்றாகிவிட்டது. இதற்கு அடுத்ததாக என்ன? அந்த மூன்றாவது நிலை தவம் துரியம் ஆகும்.

ஆக்கினை தவத்தில், புலன்கள் வழியாக, இன்பத்தை தேடியே ஓடிக்கொண்டிருந்த மனம், இங்கே தன்னையே கவனிக்கிறது. புலன்களை நிறுத்தி, ஓரிடத்தில் அமர்ந்து, முதல் உணர்ச்சியாக அழுத்தத்தை கவனிப்பதின் மூலமாக, மனமே மனதை கவனிக்கிறது. இந்த கவனிப்பில், தவ ஆற்றல், உடல்தாங்க முடியாத பொழுது, அதை உடனடியாக சாந்தி தவம் மூலமாக, மீண்டும் மூலாதாரம் இறக்கி, உடல் சக்தியாக மாற்றிக் கொள்கிறோம். உடலும் மனமும் நலம் பெறுகிறது.

இதற்கடுத்து, இறை உணர்வதற்கான வாசலாக உள்ள, துரியம் என்ற தவத்தை, குரு கற்றுக்கொடுப்பார். இந்த துரியதவத்தின் வழியாக, மனதை மனதால் அறிந்த மனம், உயிரை கவனிக்க தயாராகிறது என்ற உண்மையை இந்தக்கவிதை விளக்குகிறது.

வாழ்க வளமுடன்

-----

Present by: